الحرية المفهومة بالمقلوب.. 4 ديال السميات استغلات الأنترنت بشكل خاطئ ونوضو نقاش كبير بين المغاربة

الأنترنت خلا كل شخص يكون حر باش يعبر على رأيو كيفما بغا، لكن هاد الحرية كتفوت بعض المرات الخطوط الحمرا.
“كَود” جمعات ليكم أكثر 4 أسماء جابوها فراسهم وناض عليهم صداع كبير بسبب تصرفاتهم غير المحسوبة.
سارة أبو جاد.. العنصرية المجانية
اليوتوبوز سارة أبوجاد كعات المغاربة بعدما دارت “برانك” لراجل ختها واستغلات رضيعة صغيرة عندها بشرة سمرا، باش هو يتصدم، ودامشي لي كان نيت وقال ان “هادي مايمكنش تكون بنتو حيت عزية”. هاد الضحك الباسل لي ماشي في محلو جبد عليها النحل وولات متهمة بالعنصرية.
الناس والمعلقين عبرو على رفضهم للتصرف لي شاركو فيه طاقم طبي في مصحة خاصة ودارو عليها حملة ديال السينيال.
بعد الصداع خرجات سارة في نفس النهار وزارت شبه اعتذار، وقالت أن دري ماشي مغربي وأنه ولد صاحبت ختها ومكانتش قاصدة نهائيا العنصرية ولا أي حاجة، وأن المشكل ماشي فيها ولكن في الناس لي فهمو غلط.
مول الكاسكيطة.. سب المغاربة
شهر قبل نهاية السنة البوليس في سطات قرقبو على محمد السكاكي لي معروف ب”مول الكاسكيطة” لأنه استغل اليوتوب وبدا كيسب ويشير.
وكيل الملك لدى المحكمة الابتدائية بسطات، قال أن المعني بالأمر سب المواطنين المغاربة وووصفهم بأوصاف مهينة وحاطة من كراماتهم ومس بالمؤسسات الدستورية.
ونهار الخميس لي فات، المحكمة حكمات عليه بربع سنين ديال الحبس.
أم مهاب.. والايف ضد الجدارمية
اليوتوبوز فاطمة الزهراء المعزي لي معروفة باسم “ام مهاب” من بين الناس لي استغلو الانترنت أسوء استغلال وفعايلها دخلوها الحبس.
السيدة رفضات تمتثل لأوامر رجال الدرك الملكي بعدما دارت مخالفة وزادتها بضسارة حيت عندها متابعين في انستكَرام ودارت لايف وبدات كتصور في الجدارمية وختها دايرة الحيحة وكتهدد بالانتحار بزيزوار.
الفيديو ديال فاطمة الزهراء انتشر في اليوتوب والسلطات تحركو وشدوها ودابة محكوم عليها بشهرين غادي دوزها في سجن عكاشة.
عبير براني.. مؤخرة بالسترينكَ في التايلاند
المؤثرة والمودل عبير براني عندها علاقة قوية بمؤخرتها لي حريصة أنها تبينها في التصاور، وكاين فيديو شهير ديالها لابسة كسوة وغادة ووحدة كتقول ليها “تبارك الله”.
عبير كانت خلقات الجدل بعدما نشرات تصويرة ديالها من جزيرة في التايلاند لابسة مايو سترينكَ. التصويرة تحطات وتمسحات في ثواني قليلة لكن صحاب السكرينات معطلوهاش والتصويرة دارت البوز.
البلوكَوز قالت أن التصويرة خاصة وتحطات في صفحتها بالخطأ، واعتذرات.
فهاد القضية بالضبط، گود ماشي ضد انها تعرا وتلبس لي بغات، خاص غير الانسان يكون مصالح مع ذاتو ومايبقاش يدخل ويخرج فالهدرة، اه حطيت التصويرة ولا مافيها حتى حاجة عيب، وسدات مدام.