الواتساب تبلونطا عاوتاني.. التصاور والأوديوات مابقاوش كايتسيفطو

بزاف ديال مستخدمي تطبيق “واتساب” فكاع أنحاء العالم لقاو مشكل كبير باش يسيفطو الأوديوات والتصاور، اليوم الحد فالصباح.
الناس لقاو صعوبة باش يسيفطو التصاور فالتطبيق المشهور اللي تابع لشركة “فيسبوك”، فاكتفاوا بالنصوص فقط أو بالبارطاج ديال صور ديجا منشورة فالتطبيق، اما وحدين خرين فماقدروش يصبرو، ودازو ل”تويتر” و”فيسبوك” يحتجو ويعبرو عن غضبهم عن طريق هاشتاغ #WhatsAppDown.
ولحدود الساعة، المسؤولين على التطبيق، اللي كايستخدموه مليار ونص ديال البشر، مازال ما وضحوا طبيعة المشكل والاسباب ديالوا، ولإمتى غايستمر.
وهاذي ماشي أول مرة كايوقع مشكل فواتساب، حيت شحال من مرة العام اللي فات كانو بالزاف ديال المستخدمين كايلقاو صعوبة باش يحلوه، او يرسلو فيه ميساجات.