أيها المغاربة… راه ماشي أي واحد عندو فيسبوك نقولو عليه مناضل

يبدو أن المغاربة اختلطت عليهم الأمور وباتوا يعتقدون أن كل من فتح حسابا على الفيسبوك يقذف فيه بوجه الناس منشورا هنا أو تعليقا هناك، فهو بالضرورة محسوب على المناضلين الذين لم يُرى مثلهم في البلاد.
و هذا خطأ كبير… لأن المناضل الحقيقي ماعندوش الوقت يفتح كونط ف فيسبوك، و ما باغيش يجمع حوله مجهولين اللي يديرو ليه جيم و بارطاجي، قدر ما يحتاج لأتباع و مريدين يغوتو موراه: "هز قدم حط قدم الشوارع عامرة بالدم "…
جيم و بارطاجي متعة "المناضلين لايت" اللي عندهم كونطات و صفحات بالفيسبوك مقابلينها على مدار الساعة بنشر البوسطات و التصاور، أما المناضل السياسي أو الاجتماعي ماعندوش الوقت يضيعو بلعب الدراري ديال شوفوني و أنا أناضل، ذاكشي علاش ف الفيسبوك ماغاديش تلقى كونط ديال سي عبد الرحمن اليوسفي و لكن غادي تلقى فيه شي منادلين بحال ادريس لشكر…
و ذاكشي علاش الفيسبوك ماغادي تلقى فيه تا مناضل تايدور…
و الماركة الوحيدة من البشر اللي تقدر تتلاقها في الفيس، هي الماركات بحال فاتي فلو و موحماد مول الحانوت… الدواعش و الملاحدة… القحاب و ربات البيوت… البزناسة و الفُقَها… المعلمين و المقدمين… القواويد و ولاد الناس…
الفيسبوك ماغادي تلقى فيه تا مناضل تايدور…
لأن كونط فيسبوك كاين عند الموظف المرتشي اللي تايقول على راسو نزيه…
فيسبوك كاين عند المختلس اللي خرج من الحبس و داير فيها صوحافي…
فيسبوك كاين عند الجقايري اللي داير النظاظر باش يبان في اللايف واعر…
فيسبوك كاين عند القواد اللي تايوجد القصاير لسيادو و نهار طاحت فيها الروح نشر مائة تدوينة و تدوينة باش يقول المرحومة ماتت قضاء و قدر…
و أخيرا و ليس آخرا لأن اللائحة طويلة، فيسبوك كاين عند أبونهب اللي شفر الملايين الصحيحة من جيوب ولاد الشعب، و من بعد حل مدرسة في الفيسبوك باش يعلمهم النضال ضد الحفاري و الما المالح…
الفيسبوك ماشي ميدان النضال و الكفاح أو حتى الجهاد، بل مجرد وسيلة للاستمناء الإيديولوجي و البيولوجي، و مولاه صاوب هاذ الحيوط الزرقاء باش يربح هلى ظهر المكابيت اللي كانو تا ينشرو خراهم في حيوط الطواليطات العمومية بالكليات و المقاهي و محطات الكيران…
حسب الإحصائيات التي قدمتها شركة الفيسبوك سنة 2017، فهناك أكثر من 12 مليون مستخدم مغربي للشبكة التواصل الاجتماعي، أي أن 38% من سكان مملكة المرّوك عندهم حساب على الفيسبوك…
هل هذا يعني أن هاذ البلاد فيها 12 مليون مناضل؟
محااااال لأن البلاد اللي فيها 12 مليون مناضل مستحيل يكون فيها كل هاذ القهر و الفساد و الحكرة…