ماتسوقوش لغوات المرا للي كاينة لداخل.. بوليس مدينة نانتونغ فالشينوا سدو على عائلة كاملة فدارها خوفا من انتشار “كورونا”

البوليس ديال الشينوا التابعين لمنطقة نانتونغ بمقاطعة جيانغسو حسبو عائلة فالدار ديالها باستعمال بارات ديال الحديد، بسبب عودة بعض أفراد هذ العائلة مؤخرا من مدينة ووهان اللي انتشر فيها فيروس “كورونا” القاتل، واستمرو فإغلاق باب الدار فالوقت اللي كلسات واحد المرا لداخل كتغوت بأعلى صوتها.
وحسب فيديو انشرها موقع “ديلي ميل”، البوليس بهذ المدينة سدو على العائلة بإحكام باش مايخرجوش من الدار ديالهم، وصورو اللحظات اللي كانوا كيسدو عليهم فيها ومهتموش بالغوت ديال المرا اللي كاينة لداخل، ودارو هذشي بعدما تلونصات أخبار كتقول باللي البوليس فالشينوا مدايرينش خدمتهم باش يمنعو انتشار الفيروس اللي قتل 370 شخص وتصابو بيه كثر من 17200 واحد.
وبين الفيديو اللي نشر الموقع مجموعة من رجال الأمن اللي لابسين لباس كحل وكالسين يديرو فالبارات على باب وسراجم دار الناس اللي عاد جاو من ووهان، ويعلقو لافتة حمراء مكتوب عليها “هذ الناس عاد رجعو من ووهان، حاولوا تتجنبو أي محاولة للتواصل معاهم”.
وهذي ماشي أول مرة كيديرو البوليس ديال الشينوا هذشي، حيت نشرو نشطاء على مواقع التواصل الاجتماعي فيديوهات ديال منازل مسدودة فالعاصمة بيكين، وحاطين حداها لافتات كتعلم الناس باش مايقربوش من هذ العائلات.
مجموعة من النشطاء فمجال حقوق الإنسان فالشينوا استنكرو هذ الأفعال اللي كتقوم بها السلطات وقالو بللي هذ الطرق لا إنسانية، وماشي هي الحل الأنسب اللي غاتخلي الفيروس القاتل ماينتسرش فالبلاد.
وللإشارة، فمجموعة من المدن فالشينوا تم إغلاقها وعلى راسها ووهان، وتم منع السفر منها أو ليها، كيف مايمكنش لسكانها يخرجو من منازلهم إلا من أجل شراء الطعام أو الأقنعة الصحية.