قرار مهم ومصيري بحال الساعة الإضافية ماقدراتش الحكومة تعممو على كاع المغاربة وقسمهم النص فيهم كيفيق مع الساعة الجديدة بزز منو وبزاف ديال صحاب المهن الحرة باقي عايش بالساعة القديمة كيفيق على خاطرو

قبل ما تزاد هاد الساعة بشكل دائم كانو الحوانت بأنواعهم التسعود أغلبهم كيكون حال، واحد السويقة حدايا حتى هي التسعود كوشي حال الخضارة دجايجية الحواتة موالين الزيتون، وطبعا بزاف ديال الحوانت كانو كيحلو مع سبعة ونص خصوصا لي قبالت الإدارات أو المدارس والمعامل لي كاين معامن يروجو أما الأحياء رخاها الله، دابا مدة هادي وساعة زايدة ولكن للأسف أغلب المهن الحرة باقين عايشين وفق الساعة القديمة، فقط صحاب الإداراة والتلاميذ ولي خدامين فالشركات والمعامل هوما لي خدامين بالساعة الجديدة، أما لخريين في الغالب التسعود الدنيا باقا خاوية حتى لتسعود ونص لفوق عاد كيبداو يحلو وكتبدى تحرك القضية ويدور الغاشي، إذن من غير الناس لي مرتابطين بالوقت النظامي راه كاع لمغاربة لخريين باقين خدامين بالساعة القديمة الفرق هو أن التسعود ولات عشرة وصافي.
إلى كانت الأسباب بصح الحفاظ على الطاقة وداكشي فراه خاص الدولة تتدخل فتوقيت الفتح والإغلاق لموالين الحوانت باش على الأقل تخرج للشارع مع التمنية وتحس بلي المغاربة كلهم فايقين وبخاطرهم ماشي غير لي مرتباطين بالقطاع النظامي لي فايقين بزز منهم وحاسين بالشمتة والحكرة، وفي نفس الوقت مايمكنش يقضيو شلا غوارض ديالهم بدعوى أن المغاربة لخرين لي ممرتابطينش بالقطاع النظامي باقي عايشين وفق الساعة القديمة ومسوقهومش في قرار الحكومة بل هوما ضدو وكيجيهم الأمر غير حماق وتبعية لفرنسا وباقين عايشين وفق ساعتهم البيولوجية القديمة، وأنا نيتك نخرج نتسخر مع التسعود مثلا كنلقى شي حال وشي باقي ، فعليا الى بغيتي تقضي كاع غوارضك خاصك تخرج حتى للعشرة حيت هي الوقيتة الحقيقية فين كيبدى النشاط التجاري ولي هي التسعود القديمة.
قرار مهم ومصيري بحال الساعة الإضافية ماقدراتش الحكومة تعممو على كاع المغاربة وقسمهم النص فيهم كيفيق مع الساعة الجديدة بزز منو وبزاف ديال صحاب المهن الحرة باقي عايش بالساعة القديمة كيفيق على خاطرو، حتى ولينا في مغربين غادين بسرعتين، مغرب فايق معمش ومكره وكاعي على ساعة إظافية غير منطقية كتخليه ينوض في الظلام والموت ديال البرد، ومغرب كيعتابر الحكومة معندها عقل والعثماني غير بيدق وممسوق لا لساعة جديدة ولا حتى شي قرار آخر، وعايش مع راسو بالساعة القديمة والى فقتي قبل منو خاصك تسناه حتى يحل.