اليوم يستامعو المتهم باغتصاب الصحافية فكازا. واش غاديين يشدوه

علمت “كود” ان يتم اليوم الاثنين بالدار البيضاء الاستماع الى ع .ب المتهم باغتصاب الصحافية الفرنسية من اصول بولونية. القضية كانت تفجرات بعد شكاية قدمتها هاد الصحافية المقيمة بالمغرب تتهم فيها هاد الشخص. وقد نتج عن الاغتصاب وفق مصادر ل”كود” نزيف فالرحم وعندها شهادات طبية. اكثر من ذلك فبعد ان اظهر المتهم اهتماما بها فالصبيطار اللي مشى معاها ليه باش يبين للاطباء باللي عندهم علاقة وووو٬ رجع وحيح عليها باش ترجع ليه فلوسو اللي كان خلص ليها العملية اللي دارتها شهر شتنبر اللي فات.
هاد المتهم بلا حيا بلا حشما ناض كيدافع على راسو بدفاع غبي. كيقول باللي عندو الادلة باللي ما كانش اغتصاب. صحابو بغاو يغرقوه دارو نفس الحاجة.
دابا كاينة وحدة اخرى خرجات وتاهماتو بمحاولة الاغتصاب. وقالت باللي كاينات حالات اخرى.
اليوم تستمع ليه الفرقة الولائية للشرطة القضائية باشراف القضاء ومن بعد يحدد هاد الاخير طبيعة التهم الموجهة اليه واش يتابعو فحالة سراح ولا اعتقال ولا يزيد يعمق البحث.