قرار جديد خرج فالجريدة الرسمية.. ها بشحال ولاو الأثمنة القانونية ديال المطهرات والمعقمات داليدين

خرج اليوم فالجريدة الرسمية قرار لمحمد بنشعبون، وزير الاقتصاد والمالية وإصلاح الإدارة، واللي صدر لبارح الاثنين، باش تتحدد الأثمنة ديال المواد الكحولية الخاصة بالتعقيم والتطهير، من بعد ما عرفات ارتفاع صاروخي فالآونة الأخيرة مع ارتفاع أعداد المصابين بفيروس “كورونا” فالمغرب.
القرار اللي صدراتو الوزارة، بعد استشارة مجلس المنافسة واستطلاع رأي لجنة الأسعار المشتركة بين الوزارات، كيحث على تنظيم أسعار المعقمات لفترة مؤقتة ديال ست شهور، وكيحدد أسعارها القصوى بالجملة والتقسيط.
فيما يخص اسعار التقسيط، وهي أثمنة البيع للمواطن، فالقرعة ديال 50 ميليلتر غاتولي تدير15 درهم، ديال 100 غاتدير 20 درهم، ديال 300 غادير 35 درهم، ديال يطرو غادير 105 دراهم، وديال جوج يطرو غادير 140 درهم.
بالنسبة لاسعار الجملة، كيتحدد سعر القرعة ديال 50 ميليلتر ف200 درهم فكل يطرو، من 50 ل100 ميليلتر ف150 درهم فكل يطرو، من 100 ل300 مللتر ف84 درهم لليطرو، من 300 ميليلتر للتر واحد ب75 درهم لليطرو، والقرعة اللي كاتفوت لتر غايكون ثمنها أرخص وهو هو 50 درهم لليطرو.