من بعد ما بعض المغاربة دارو شرع يديهم ودارو حملة ديال السينيال على حسابات اعتابروها “تافهة”.. اليوتوبوز أسماء بيوتي: خرجتو عليا وراجلي غادي يطلقني وسمحولي لا غلطت

بعدما نشرت فيديو في اليوتوب كتبين فيه اللهطة على المواد الغذائية في السوق وكتشجع الناس يخرجو يضاربو على الماكلة، الكونط ديال أسماء بيوتي سينيالاوه لمغاربة وطار من الأنستكَرام.
طبعا حنا ف”كود” ضد السينيال، وضد ان الشعب يختار شكون تافه وشكون لا، وشكون من حقو يعبر على اراؤو وشكون لا. الا لا كان الامر كيتعلق بناس بحال المتخلف ابو نعيم وداك مي نعيمة حيت هادو كيعرضو حياة الناس للخطر وحتى فهاد الحالات الامن اللي كيتدخل ماشي المواطنين.
حيت الى بقينا هكا، اي واحد يفيق يجيه حسب دوقو المحتوى تافه يسينياليه ويمسحو، وهذا غلط وضد حق حرية التعبير، ولي تافهه بالنسبة لواحد مزيان بالنسبة للاخر.. ما من حق حتى واحد يمنع اخر من يحط مضمونو فانترنيت حيت حنا دولة الحق وحرية التعبير.
مهم، نرجعو لأسماء لي كتقول على راسها مؤثرة، من لبارح وهي كتبكي على الناس ودارت كونط جديد كتقول ليهم ما نعستش وراجلي غادي يطلقني بسبب هادشي لي وصلتوني ليه، وطلبات السماح من الناس، وقالت ان مل انسان كيخطأ.. لأنه لحساب ديالها في أكثر من مليون وكتربح منو فلوس صحيحة.