واش وزارة الصحة قادرة تدير التحاليل لكَاع الناس اللي شاكين فإصابتهم ب"كورونا"؟ خبير كيكشف ل"كود" شحال قادر المغرب يدير من تحليلة دالفيروس فنهار واحد وفآشمن مختبرات

يوميا، عشرات التحليلات كيديروها الناس اللي شاكين فإصابتهم بفيروس "كورونا" المستجد فالمغرب، وزارة الصحة كتعلن بشكل منتظم على نتائج التحاليل اللي كيتم الإجراء ديالها، وكتعلن على أعداد المصابين بالفيروس، وعدد الناس اللي تبين أنهم ماعندهم والو.
وحسب الموقع الرسمي ديال الوزارة اللي مخصص لوباء "كورونا"، مللي تسجلات أول حالة إصابة بالفيروس فالمغرب ف2 مارس لحد الآن، يالاه تدارت 451 تحليلة للناس المشكوك فيهم، وهو رقم قليل بزاف بالمقارنة بعدد التحاليل اللي كتدار فاليوم الواحد فميريكان أو فالدول الأوروبية والمتقدمة.
واش هذا كايعني بللي المغرب ماعندوش الإمكانيات المادية واللوجيستيكية باش يدير التحليلات؟ وإلا شحال كيمكن يدير من تحليلة فالنهار؟ وشنو هوما المعاهد والمختبرات اللي كتدير هذ التحليلات فالمغرب؟
باش يجاوب على هذ الأسئلة، قال البروفيسور مصطفى الناجي، مدير مختبر علوم الفيروسات بجامعة الحسن الثاني فكازا، بللي كل آلة ديال التحاليل كيمكن ليها تضم "بلاكيت" كتتسع ل 96 تحليلة، وقال بللي كل مختبر يقد يشمل جوج ديال هذ الآلات، وكيمكن ليها تدير هذ التحاليل فكل ساعتين.
واعتبر الناجي بللي فيروس "كورونا" هو من الفيروسات الخطيرة اللي كتوصل الخطورة دياله للدرجة 3 (p3)، وهذا كيعني بللي ماشي جميع المختبرات يمكن ليهم يديرو عليه التحاليل اللازمة، لأنه خطير ويقدر يأثر على صحة الإنسان اللي كيدير التحليلة عليه وكذلك المحيط ديالو.
وأكد بللي فالمغرب كاينين فقط 5 مختبرات اللي كيديرو عليه التحاليل، وهوما المختبرات اللي كيقدو يديرو أبحاثهم على هذ الفيروسات اللي بهذ الدرجة من الخطورة، وهوما معهد باستور، والمختبر الوطني للأنفلونزا والفيروسات التنفسية بالمعهد الوطني للصحة بالرباط، ومختبر المستشفى العسكري فالرباط، والمختبر العسكري فكَلميم، ثم مختبر بيوفارما.
وكيف قال الناجي، إلى كان كل مختبر فهذو كيتوفر على آلة اختبارية وحدة، كيمكن ليهم بالتالي يحللو 480 تحليلة فكل ساعتين، وإلى كانو عندهم جوج آلات، غادي يحللو 960 تحليلة فساعتين فقط، وهذا عدد كافي للكشف على الحالات اللي تقاست بالفيروس فالمغرب وبشكل يومي.
وفجوابو على سؤال علاش المغرب دار تحليلات قليلة لحد الساعة، كيقول الناجي بللي هذا راجع لأن الحالات المشتبه فيها اللي ظهرات قليلة كذلك "راه مايمكنش تدار التحاليل لكلشي أو أي واحد جاتو السخانة أو شي كحة عادية، لازم يبانو الأعراض الحقيقية دالفيروس باش تدار هذ التحاليل، ولحد الساعة هذ الأعراض مايتصابوش بيها بزاف"، على حد قولو.
وقال بللي تكاليف التحاليل الباهضة اللي كتتحملها الدولة هي اللي كتخليها تقنن عدد التحليلات اللي كادير على "كورونا" فاليوم، وتختار الحالات المشتبه فيها بعناية، خصوصا وأن الآلات اللي كتستعمل هذ المختبرات واللي كتحمي من الفيروسات ذات الدرجة 3 من الخطورة، واللي هي Pcr 7000 وPcr 7500، حتى هي مكلفة جدا"، على حساب هضرتو.