الداخلية خربقاتها فهاد ورقة الخروج. دارت تجمعات وهي كتمنعهم. علاش ما فكراتش فحلول قبل وعلاش شي وحدين بداو حالة الطوارئ بكثير من الغباء

وزارة الداخلية نوضات الروينة بقرارها المتعلق بكيفاش تحصل علي ورقة الخروج. وقع غلط كبير وما تابعاتوش بعملية تواصلية تشرح للمواطن اش كتعني. كثار فهمو اللي عندو الورقة يخرج. فاسبانيا ما كاينش هاد التخربيق ديال لوراق. كل واحد يخرج كيسولوه فيه غادي وما يمكنش يقبلو مثلا واحد خارج يجيب باريزيانا ولا نص يطرو لحليب او واحد مشى يشري التقضية من بلاصة بعيدة منو.
الورقة بغات الداخلية تكونطرولي كثر ولكن دارت مشاكل. من البارح كنشوفو مشاهد ضد حالة الطوارئ الصحية. ناس كيتخاطفو عليها ففاس وشي بزنازة كيبيعوها فكازا وشدو شي وحدين من هاد العينة فايت ملول وانزگان واليوم الزحامات قدام السيبيرات.
اولا باش قالت للمغاربة ممكن يطبعوها راها كانت كتخربق. واش الغالبية العظمى عندها هاد امبيرمانت؟ كانت تبقى فقرار واحد. يخدمو معاهم متطوعين من جمعيات الحي باشراف السلطة ويفرقو علي المواطنين الورقة.
ثم هاد القرار ديال بدء حالة الطوارئ ولوراق مازال ما وجدوش راه غبي. كان خاص وقت على الاقل 24 ساعة باش كل واحد يعرف كيفاش يدبر علي هاد لوراق وما يكونش التبزنيز فيهم.
هاد المشاهد مع شي مشاهد اخرى ديال شي مرود كيجريو كيدفعو اللي كاين فالزنقة البارح مع الستة العشية يدخلو لديورهم راه ما كناش نوصلو ليه. يالله بدات حالة الطوارئ تكون شوية البيداغوجية يسولو بنادم. راه باش الدولة تنجح فهاد الشي خاصها تشرح وخاص المواطن يشارك فهاد الشي. بتصرفات بحال هادي غادية تصعب عمليات بسيطة.
خاص تدخل عاجل للداخلية باش تحيد مشاهد بحال اللي شفنا