مغاربة اللي اختارعوه.. روبو كيحارب الإشاعات على كورونا وكيدير كشف افتراضي على واتساب

شباب كينتميو لمجموعة "أومياداطا" كرياو روبو فتطبيق "واتساب"، كيساعد الناس على الوصول للمعلومة الصحيحة والرسمية حول فيروس كورونا المستجد فالمغرب.
هذ الروبو، اللي سميتو "كوفيدبوت"، قادر يجاوب على مجموعة من الأسئلة ديال الناس اللي كيتملمو معاه عبر الرسائل الفورية على التطبيق، كيقدم ليهم ليست ديال الخيارات والأسئلة، وكيمكن ليهم يديرو يديرو رقم واحد من الخيارات اللي كيمكن يجاوب عليه الروبو.
ومن أهم هذ الخيارات، الروبو كيعطي آخر الأرقام على الحالة الوبائية فالمغرب، كيمكن يحدد عدد الإصابات بكورونا فكل جهة حسب معطيات رسمية، كيمكن يحدد أعراض الإصابة آشناهوما، ويقدم النصائح من اجل الوقاية من الفيروس، بالأضافة لمزايا أخرى.
كذلك الروبو قادر يدير كشف افتراضي للفيروس، من خلال السؤال على الأعراض اللي كيعاني منها الشخص، واللي كتعطي فكرة على واش يقدر يكون مصاب بالفيروس ولا لا.
فالصفحة ديال مجموعة "أومياداطا" ففيسبوك، كيقولو الشباب اللي كرياو الروبو بللي الهدف منو بالأساس تضامني وتوعوي وتحسيسي، وكذلك هو وسيلة باش الناس اللي شاكة فراسها مصابة تتصل بالأرقام اللس دايراها الوزارة لهذ الصدد، وكيتعلق الأمر برقم ألو يقظة 0801004747 أو الرقم 141.
وللتواصل مع الروبو عبر تطبيق واتساب https://wa.me/212604345645?text=Salam