واحد انتقد سوء التعامل مع مصابي كورونا فصبيطار القصر الكبير.. المندوب الإقليمي: الوحدة الاستشفائية مجهزة مزيان وحنا متبعين – فيديو

نشر أخ عاملة من العاملات اللي تقاسو بفيروس كورونا المستجد فبؤرة السردين المصبر بمدينة العرائش، على الحساب ديالو فموقع "فيسبوك" فيديو كيطالب فيها السلطات والمندوب الإقليمي باش يتدخلو بشكل عاجل باش يحسنو الوضعية اللي كتعرفها الوحدة الصحية ديال القصر الكبير، اللي كتتعالج فيها الأخت ديالو.
الشاب عبد اللطيف أكد فالفيديو، وعلى حساب ما قالت ليه الأخت ديالو، بللي السبيطار اللي كتتعالج فيه فواحد الحالة يرثى لها، وحتى الوجبات اللي كيجيبوها ليهم باردة ومقموعة ومكاتشبعش، فالوقت اللي المصابين بكورونا خاصهم ياخدو وجبات اللي تكون صحية باش تتقوى المناعة ديالهم.
وحسب ما قالت ليه ختو، قال عبد اللطيف بللي أدنى شروط الوقاية ماكايناش، وبللي حتى الفام دميناج مكاتجيش للشومبر اللي فيها المصابين، اللي عطاوهم سطل وكراطة باش يسيقو راسهم، بالإضافة لأن الشومبر مامجهزاش مزيان، والدوش فيه الما بارد، والمصابين مكرفصين.
https://www.facebook.com/groups/laracheourhome/permalink/1623731661114279/
عبد اللطيف تساءل فالفيديو كيفاش ممكن تكون الأخت ديالو مريضة لكن ما داروش ليه لا هو لا عائلتو التحاليل باش يعرفو واش عاداتهم أو لا لا، وطلبو منهم فقط أنهم يعزلو راسهم ويديرو جميع سبل الوقاية حتى تبان فيهم أعراض الإصابة.
فاتصال "كود" مع عبد السلام الذهبي، المندوب الإقليمي للصحة فالعرايش، لاستفسارو على هذشي، قال بللي تابع الفيديو، وتساءل علاش قال هذ الشاب هذ الكلام، خصوصا وأن الوحدة الاستشفائية مزيانة، وما فيها حتى مشكل، باستثناء فاللحظة فاش كيجو مصابين جداد، بحيت فداك الوقت كيبقاو يتسناو ويقدرو يتكرفصو شوية، لكن مباشرة من بعد ما كايدخلو للغرف ديالهم كيحظاو بعناية استثنائية.
وزاد الذهبي كيقول بللي المندوبية الإقليمية غتكون أول من يتدخل إلى كانو الأطر الطبية ما مهليينش فمرضى "كوفيد 19′′، بالعكس الأمور مزيانة وبيخير، والماكلة اللي كتعطى للمصابين مزيانة، وكيستفدو من رعاية خاصة.
وقال الذهبي بللي المديرية كتدير التحاليل للأشخاص المخالطين اللي كتظهر عليهم علامة الإصابة بالفيروس وماشي كلشي، وفانتظار تبان التحاليل ديالهم كيتم الاحتفاظ بهم