هيئة المحامين فكازا دارت بادرة مزيانة للتبرع بالدم.. ونقيب المحامين ل"كود": تبرعو 79 محامي ودرناها باش نسدو الخصاص اللي كتعرف مراكز التحاقن

اليوم الخميس دارت هيئة المحامين فكازا حملة مزيانة باش يتبرعو المحامين بالدم، واللي حضر ليها نقيب الهيئة، حسن بيراوين، ورئيس جمعية هيئات المحامين فالدار البيضاء، عمر ودرا، فهذ المرحلة اللي كتعرف فيها البلاد حالة طوارئ صحية بسبب فيروس كورونا المستجد، واللي أدات لوجود خصاص فمخزون الدم.
وقال بيراوين بللي الهيئة وضعات اليوم دار المحامي رهن إشارة المركز الجهوي لتحاقن الدم، فهذ الحملة اللي شاركو فيها بالضبط 79 محامي، بالإضافة لمحامين كثار خرين لكن ماتمكنوش من التبرع بحكم ضيق الوقت، حيت وقت اشتغال المركز ضيق فهذ المرحلة، وكيتحدد بين 10 دالصباح و1 ونصف بعد الزوال، والأسرة اللي متوفرة تحدد عددها بين 6 وسبعة دالأسرة.
وزاد بيراوين كيقول، فتصريحو ل"كود" بخصوص حمرة التبرع بالدم، بللي توجدات اللوائح ديال المحامين اللي غيتبرعو، والتوقيت اللي غيجيو فيه وحددنا المدد الزمنية ديال التبرع، باش ميكونش هناك اكتظاظ، وباش تدوز العملية بشكل إيجابي، ويتم الالتزام بالإجراءات الاحترازية والوقائية.
وختم بيراوين تصريحو بالقول بللي هيئة المحامين كانت من ضمن فعاليات المجتمع المدني الأولى اللي ساهمات فصندوق جايحة كورونا، بحيث كانت ساهمات ب250 مليون سنتيم.