العساسة دالغابات كاعيين بسباب إقصائهم من الخدمة بالليل فالحجر الصحي وخافو على الغابات من الضياع.. "كود" سولات مندوب الغابات وتهرب من الجواب

من بعد قرار وزارة الداخلية اللي حدد القطاعات والمهن اللي غيسمح ليها تخرج من مورا السبعة باش تخدم، مجموعة من الخدامي ولات محرومة من الاشتغال بالليل، ومن أبرزها مهنة بو غابة والحراس دالغابات اللي كيعسو عليها فالليل.
مهنيو الغابات استنكرو من هذ الإقصاء، وقالو بللي خدمتهم بلليل كتسمح بإحباط مجموعة من العمليات ديال نهب الثروة الغابوية وتقطيع الأشجار، خصوصا فهذ الفترة دالحجر الصحي. وهكذا مكايسمحوش لبزاف ديال الحوادث يوقعو وكيحاقظو على الثروة الغابوية من قطاع الطرق، لكن إفيمكنلى ماخدموش بالليل فيمكن الثروة الغابوية تتدهور.
وقالو مهنيين الغابات، فبلاغ ليهم، بللي كيحملو المسؤولية الأولى للإدارة الوصية على قطاع المياه والغابات ووزارة الداخلية، على التبعات السلبية اللي ممكن تنتج إلى ما خدموش بالليل.
واكدو بللي هوما اللي كيحميو الموروث الإيكولوجي الوطني، وخدمتهم ضرورية، بالإضافة إلى أنهم قايمين بكَاع الإجراءات الوقائية والاحترازية اللي فرضاها الحكومة باش يحميو راسهم من فيروس كورونا المستجد.
و"كود" اتصلات بالمندوب السامي للمياه والغابات ومكافحة التصحر، عبد العظيم الحافي، وسولاتو على كيفاش غيوليو العساسة دالغابات يشتغلو من بعد قرار وزارة الداخلية، لكنه ما جاوبش وتحجج بللي عندو شي شغل، وعاودات كود اتصلات بيه من بعد نصف ساعة كيف طلب منها، لكن التيليفون ديالو كان طافي.