واش مهنيو نقل البضائع غيقدو يتحركو من بعد السبعة.. البوزيدي ل"كود": خاصنا ترخيص حيت غالقاو صعوبة فالتنقل فالليل

مع القرار الجديد ديال وزارة الداخلية، اللي كيمنع التجوال فالليل من مورا السبعة، قال عبد الجليل البوزيدي، رئيس جمعية نقل البضائع فدرب عمر، بللي الناس اللي كينقلو البضائع غيوليو يلقاو صعوبة فالتنقل ابتداء من غدا، وخصوصا اللي عنهم مسافات طويلة وكيبقاو شادين الطريق حتى لليل.
وزاد قال البوزيدي، فتصريحو ل"كود"، بللي قبل فاش كان حظر التنقل ممنوع من مورا الستة، كانت عند المهنيين ديال نقل البضائع رخصة باش يتحركو، حيت الحجر الصحي مكينطابقش على صحاب السلعة اللي كيزودو المدن بالمواد الأساسية، لكن دابا مع رمضان وحظر التنقل من السبعة لفوق الأمور تغيرات، وهوما مابقاوش عارفين شنو يديرو.
وقال رئيس الجمعية بللي جاهم هذ القرار على غفلة وماتعلموش من قبل، "ودابا كيفاش غادي يدير واحد هاز ماطيشة من طنجة حتى لأكادير أو العكس؟ والطريق طويلة وضروري غيطيح عليه الظلام وماعندوش ترخيص جديد باش يتحرك، ويقدرو يوقفوه"، على حد قولو.
لكن وزارة الداخلية شارت فالقرار، ديالها لبارح، بللي منع التنقل غيكون يوميا من السبعة حتى للخمسة دالصباح ابتداء من اللول درمضان بالنسبة للمواطنين، لكن فالمقابل كاين استثناء الأشخاص العاملين بالقطاعات والأنشطة الحيوية والأساسية.
وانطلاقا من هذ الأساس، كيخص المهنيين ديال النقل يسولو على راسهم فالعمالات والولايات، يعني فالبلايص اللي خداو منها الترخيص النهار اللول باش يخدمو فالليل، وشوفو واش غيتعطى ليهم ترخيص جديد او يقدو يتنقىو بالترخيص العادي ديالهم.
وفالغالب، الوزارة هذ الأيام غادي تحدد ليستا ديال هذ المهن الأساسية اللي غيتم السماح ليها بالاشتغال والتنقل من بعد 7، والخروج ديال المهنيين من مورا هذ الوقت غيكون استثناء، وبالتالي من غير الوارد مايدخلوش مهنيي نقل البضائع الأساسية معاهم.