راسلات فدرالية جمعيات وكالات الكرا دالطوموبيلات فالمغرب رئيس الحكومة سعد الدين العثماني، باش تطلب منو يتخذ إجراءات تضامين ومستعجلة لمساندة هذ المقاولات اللي سدات بسبب حالة الطوارئ الصحية اللي تسبب فيها فيروس كورونا المستجد. وشارت الفيديرالية، فالمراسة اللي حصلات عليها "كود"، بللي كاينة 10 آلاف وكالة سادة فالمغرب فهذ الحجر، الأغلبية ديالها غادير فاييط، وهذشي غيأدي لفقدان 30 ألف شغل مباشر. وطالبات الفيدرالية باش يتم إعفاءها من آداء الضريبة السنوية على الطوموبيلات وآداء الضريبة على الشركات اللي كيقل رقم معاملاتها على 500 ألف درهم، وتخفيض نسبة الضريبة على القيمة المضافة من 20 حتى ل10 فالمية، بالإضافة لخفض الفوائد على القروض، باش تولي النسبة ديالها ف3 فالمية دون احتساب الرسوم، وتقرير لافيزيت ديال الطوموبيلات مرة فالعام فقط.
