مديرية الأوبئة: الحجر كيهلك الصحة النفسية ديال المواطنين ومايمكنش يستامر. وها سيناريوهات انتشار كورونا بعدما نوليو نخرجو من الدار وها شنو خاصنا باش نقضيو على الفيروس

أكدات مديرية علم الأوبئة ومحاربة الأمراض بللي لازم يترفع الحجر الصحي، حيت عندو تأثيرات سلبية، لا على مستوى الاقتصاد الوطني، ولا على الجانب الصحي للمواطنين.
بالنسبة للتأثير السلبي ديال الحجر الصحي على صحة المواطنين، كتقول المديرية، فتقرير ليها كيخص الرصد الوبائي لفيروس كورونا المستجد وكيحدد سيناريوهات ما بعد الحجر، بللي بسباب الحجر يقدرو المواطنين يعانيو من اضطرابات نفسية جديدة، أو تسوء حالة اللي كيعانيو من هذ الاضطرابات، كيف يقدر يكون تأثيرو سلبي حتى على اللي كيعانيو من أمراض اخرى من غير "كوفيد 19" بحكم أن "لابريز أون شارج" ديال هذ الأمراض كتصعاب فهذ المرحلة الوبائية مع الحجر.
ومن الحجج اللي استعرضاتها المديرية باش يترفع الحجر، هي السيطرة على الوباء فجميع الجهات ديال المغرب، سواء الجهات اللي كتعرف تطور وبائي، أو الجهات اللي عرفات انخفاض ملحوظ فيه، أو الجهات الأخرى اللي المنحنى ديال تطور انتشار الفيروس عندها مسطح.
بالنسبة لتوقعاتها من بعد رفع الحجر الصحي، كتقول المديرية فتقريرها بللي عندها جوج سيناريوات: السيناريو اللول فيه عدد الإصابات غينخفض بشكل ملحوظ وغادي تسالي السلسلة الوبائية بين 16 و22 ماي، وغادي يتسلجو ما بين 10 حتى ل20 إصابة فبعض الأماكن المهنية اللي كتعتمد على العمل بشكل جماعي.
بالنسبة للسيناريو الثاني، كتقول المديرية بللي ممكن يكون واحد التطور وبائي فالمنحنى على شكل "أسنان المنشار"، بحيت غترتفع الإصابات وترجع تنخفض فكل يوم وبوتيرات قليلة، وغيتم بالتالي تسجيل إصابات فبعض البؤر.
ولكن واخا هذشي، عودة الوباء من بعد رفع الحجر كتبقى واردة، وبالتالي تقدر ترتفع نسبة العدوى، ويبانو مصابين بلا أعراض، وعلى هذشي مديرية الأوبئة حددات مجموعة من الأهداف اللي خاصها تدير من بعد رفع الحجر الصحي باش تبقى مسيطرة على الوضعية الوبائية، ومن بينها التقليص من ظهور إصابات جديدة، وتوقف انتشار الفيروس فالأماكن المغلقة وفالجهات بشكل عام.
وباش يتم القضاء على الوباء بشكل كلي، كتقول المديرية بللي خاص منظومة صحية قادرة تواجه موجات جديدة ديال انتشار الفيروس، وفنفس الوقت تستجب للحاجيات الصحية الأخرى، بالإضافة لمنظومة الرصد السريع والعناية حتى بالنسبة للمخالطين، ومنظومة مراقبة وبائية قادرة على تتبع وكشف عودة الوباء، بالإضافة لتعزيز السطوك ديال آليات الحماية الفردية (بلوزات، كمامات..)، ووضع حكامة ترابية جيدة من بعد الخروج من الحجر.