طبيبة شبح رفضات تعالج مرضى كوفيد وماكتعاملش مزيان مع المواطنين كرماتها "دوزيم".. ومواطنين كيستنكرو

عبرو مجموعة من المواطنين فوسائل التواصل الاجتماعي على استنكارهم بسبب تكريم جمعية "مبادرة الخير" فبرنامج "دير يديك" على القناة الثانية "دوزيم" لطبيبة كتنتمي لواحد من المراكز الاستشفائي بعمالة الفداء درب السلطان، وشكرها بحال إلى كانت من الطاقم الطبي المتخصص بعلاج مرضى "كوفيد 19″، وأكدو المواطنين بللي هذشي ماشي صحيح، والسيدة عاطياها غير للغيابات غير المبررة، الشي اللي خلا الإدارة تتابعها وتعطيها إنذارات.
وحسب المعطيات اللي توصلات بيها "كود"، فالطبيبة الشبح جاتها فرصة باش تخدم مع الأطر الصحية فواحد من السبيطارات اللي كتستقبل مصابي فيروس كورونا المستجد، وتتكفل بعلاجهم، لكنها رفضات بدعوى أن عندها طفل مصاب بمتلازمة داون "تريسوميك".
https://www.facebook.com/groups/136658900379665/permalink/540318646680353/
ومن غير هذشي، الطبيبة سمعتها خايبة فالسبيطار، حيت بالإضافة لأنها كتغيب، حتى إلى حضرات كتحاول تتملص من مسؤولية أنها تقلب المرضى اللي كيزورو المركز الاستشفائي وتعاين حالتهم وتقدم ليهم العلاج، وماكتحطش عليهم يديها بحجة أنهم كَاع ما كيتوفرو على ورقة الخروج الاستثنائي، وهي فالأصل خايفة على راسها من كورونا.
الناس استغربو من هذ التكريم غير المنطقي، وتساءلو واش دوزيم ما بحثاتش على السيدة قبل ما تكرمها؟ وواش كانت عارفة أنها ماكديرش خدمتها ومابغاتش تعالج مرضى "كوفيد 19" وحتى المرضى العاديين، وكتغييب بزاف؟ خصوصا وأن كلشي عارف حقيقتها فالسبيطار، وهذشي كيعزز الشكوك لا تكون دوزيم أو الجمعية متواطئين فهذشي، باش يحسنو سمعتها.