من سوء حظ إدارة مستشفى محمد السادس فمراكش أن الشاب مغربي اللي عندو الجنسية بريطانية ومصاب بفيروس "كورونا"، واللي نشر فيديو كيبكي فيها بالدموع على سوء معاملة الطاقم الصحي فهذ المستشفى، ماشي شخصية عادية، بل الأمر كيتعلق بعماد هندي، المنتج وكَاردكور لمجموعة من الفنانين والمشاهير فبريطانيا، وهو واحد السيد معروف بزاف فالنكَليز، وعندو نفوذ، وخصوصا فالساحة الفنية. صحاب هندي وصلو قضيتو للملك من بريطانيا اليوم هندي أكد لإدارة المستشفى بللي علم السفارة البريطانية بكَاع داكشي اللي وقع ليه، وتكلم مع بزاف ديال المشاهير البريطانيين اللي كيعرفهم بشكل شخصي، واللي أكدو ليه أنهم غايوصلو المعاناة ديالو للملك محمد السادس، والقضية غادي تكبر. الشاب المغربي البريطاني كيقول بللي واخا تحبس ليه الفايس وتسينيالا باش مايهضرش هو قادر مازال يهضر على المعاناة ديالو فكونطات خرين، وكشف بللي إدارة المستشفى مازال زايدة فيه، وكانو بغاو يحيدو ليه التيليفون من يديه، وبداو يهددوه باش يمنعوه من نشر الفيديوات والستاتوات بأي طريقة. هندي، اللي ستمر فنشر قصصو الأليمة فمستشفى محمد السادس فمراكش من حسابات فيسبوكية خرى، كيقول بللي هذي 12 ليوم وهو فالمستشفى، وبللي عاملات النظافة أكثر شجاعة من الأطباء اللي مكايقلبوش الحالة ديالو عن قرب، وكايراقبوه غير من بعيد ومن مور لباب، وقال بللي هذشي مكاينطابقش عليه بوحدو، بل على كَاع مرضى "كورونا" فالسبيطار. عاود الشاب على معاناة الناس لوخرين اللي التزمو الأغلبية الصمت ومالقاو جهد باش يحتجو، من ضمنهم واحد السيدة اللي مريضة هي وولدها اللي عندو عامين ب"كورونا"، واللي بقات ترغبهم باش يعطيوها الما المعدني لكن مابغاوش. وصحاب هندي فبريطانيا وفالمغرب دارو كل ما فجهدهم باش يعاونوه، صحابو بداو يلونصيو مجموعة من الأوديوات على تطبيق "واتساب"، كيقولو فيها بللي هوما متبعين الحالة ديال صاحبهم، وكيستنكرو سوء المعاملة والإذلال اللي تعرض ليهم فالمستشفى، ومنهم إدارة المستشفى كتكذب والمديرية غتفتح تحقيق وفي ردها على هذشي، خرجات إدارة المستشفى الجامعي محمد السادس فمراكش كتنشر فيديوات على أجنحة منظمة ونقية ديال السبيطار، واليوم دارت بلاغ توضيحي كتقول فيه بللي "الأطر الصحية كيسهرو على راحة المرضى، حسب ما هو مسطر من طرف وزارة الصحة، خصوصا فيما يخص ظروف الإيواء والإطعام"، كيف هضرو على أن المراحض نقية والخدمات المزيانة والدعم النفسي للمرضى. وأكدات المديرة الجهوية ديال الصحة جهة مراكشآسفي بللي غادي تفتح تحقيق فالقضية، بعد اطلاعها على فيديو هندي وداكشي اللي كينشر فالموضوع. وكان هندي نشر لبارح فبديو كتقطع فالقلب، على الحالة اللي لقا فبها الشومبر ديالو فاش جا ليها اول مرة، وكيفاش لقا فراشو موسخ، وبللي حتى الطواليط منعوش يمشي ليها وعطاوه طاسة فين يقضي حاجتو، وهذشي اللي خلاه يبكي بحرقة فالفيديو، ويطلب من السلطات تفتح تحقيق فهذشي.
