حصيلة كورونا ف24 ساعة: 95 حالة جديدة و2 وفيات.. فالمجموع وصلنا ل6607 فالطوطال و3310 تشافاو و190 توفاو.. ولاول مرة عدد اللي تشافاو فات المصابين اللي تحت العلاج

علنات وزارة الصحة، اليوم الخميس، تسجيل 95 اصابة جديدة بفيروس كورونا فهاد 24 ساعة الأخيرة، ووصل الطوطال ل6607 مصاب.
وكشف محمد اليوبي، مدير مديرية الأوبئة والوقاية من الأمراض، انه تم تسجيل 2 وفيات جديدة، ووصلنا فالمجموع ل190، وبالتالي نسبة الإماتة بقات مستقرة ف2,9 فالمائة.
بالنسبة لحالات التعافي، تسجلات اليوم 179 حالة شفاء جديدة، وبلغ العدد الإجمالي 3310، اي بنسبة فاتت النص، تحديدا 50,1 فالمائة، وأكد اليوبي ان أعداد المتعافين تجاوزات أعداد المصابين اللي كيتلقاو العلاج.
وقال المسؤول فوزارة الصحة بللي تم اكتشاف 81 حالة من الإصابات اللي تسجلات اليوم عن طريق التتبع الصحي للمخالطين، أي بنسبة 86 فالمية.
وعدد المخالطين وصل فالمجموع ل37290، منهم 7973 مخالط مازالين تحت المراقبة الصحية.
واستبعدات التحاليل المخبرية، 1957 حالة خرجات نتائجها سلبية، وبلغ مجموع الحالات السلبية اللي تم اكتشافها منذ بداية الوباء ل71315 فالمجموع.
بالنسبة لمرضى "كوفيد 19" اللي كيتعالجو حاليا، ف91 فالمية منهم ماعندهم حتى أعراض أو اعراضهم بسيطة وخفيفة، و8 فالمية حالتهم متوسطة ولا تدعو للخطر، و1 فالمية فقط اللي حالتهم حرجة.
اما بالنسبة للتوزيع حسب السن والجنس، فمعدل اعمار المصابين تحدد ف35 سنة، و58 فالمية منهم ذكور، و42 فالمية إناث.
وهذا توزيع الاصابات حسب الجهات: