ها علاش مهم بزاف نلتازمو كمغاربة ومغربيات. سيناريوهات رفع الحجر الصحي: الى لبسنا الكمامات واحتارمنا التدابير نقدرو نوصلو ل18720 اصابة بكورونا.. الى رخيناها ومادرنا والو من هادشي والشعب كامل خرج غادي نصولو ل17 مليون حالة ف100 يوم

المندوبية السامية للتخطيط نشرات مجموعة من السيناريوهات على رفع الحجر الصحي، بينات ان الاصابات بفيروس كورونا المستجد تقدر توصل لما بين 18.720 و17 مليون اصابة غير ف 100 يوم، واللي غادي يشكل الفرق هو احترامنا كافراد لتدابير الحماية.
وقالت المندوبية، فدراسة خرجاتها لبارح السبت بعنوان: "جايحة كوفيد-19 فالسياق الوطني: الوضعية والسيناريوهات"، انه حدو ماكاينش لقاح ولا مايسمى بمناعة القطيع، كورونا غادي يبقى معنا وغايبقى ينتاشر، وفنفس الوقت رفع الحجر الصحي ضروري وحتمي حيت عندو تأثير اقتصادي واجتماعي سلبي.
المندوبية حطات 3 سيناريوهات لرفع الحجر وهي:
1- رفع الحجر الشامل:
فهاد السيناريو اللي كاع السكان اللي عندهم قل من 65 عام وماعندهم حتى مرض مزمن (27,5 مليون واحد)، غادي يخرجو وكلهم غايحتارمو تدابير الحماية، غادي نوصلو ل2 مليون و800 الف اصابة بكورونا ف100 يوم، والنظام الصحي غادي يطيح ف62 يوم.
وفحالة مالتزامناش بتدابير الحماية غادي نوصلو ل17 مليون مصاب، والنظام الصحي غادي يمشي ف28 يوم.
2- رفع الحجر الواسع:
فهاد السيناريو اللي السكان اللي نشطين وخدامين وعندهم قل من 65 عام وقل من 15 العام وماعندهم حتى مرض مزمن (16,7 مليون واحد)، غادي يخرجو وكلهم غايلتازمو بتدابير الحماية، غادي نوصلو ل31.663 اصابة ف 100 يوم، وغادي نحتاجو 3200 سرير، و160 سرير إنعاش، وغايموت 1266 مغربي.
وفحالة ماحتارمناش تدابير الحماية غادي نوصلو ل844 الف مصاب، والانعاش غادي يعمر ف 50 يوم.
رفع الحجر المقيد:
فهاد السيناريو اللي السكان اللي نشطين وخدامين وعندهم قل من 65 عام وماعندهم حتى مرض مزمن (7,9 مليون واحد)، غادي يخرجو وكلهم غايحتارمو تدابير الحماية، غادي نوصلو ل18.720 اصابة ف 100 يوم، وغادي نحتاجو 3200 سرير، و160 سرير إنعاش، وغايموت 748 مغربي.
وفحالة ماحتارمناش تدابير الحماية غادي نوصلو ل155 الف و920 مصاب، وسبيطارات غاتعمر ف 75 يوم.
وختمات المندوبية دراستها بالقول: الدرس الكبير اللي بيناتو هاد السيناريوهات هو اهمية المجهود الفردي، وضرورة احترام التباعد الاجتماعي ولبس الكمامات، وگاع باقي التدابير المفروضة، حيت الى مالتازمناش غادي نضربو ف8 عدد المصابين وغادي نغرقو نظامنا الصحي فظرف 100 يوم.
طابلو كيلخص هاد السيناريوهات:
رابط تقرير المندوبية:
https://www.hcp.ma/Pandemie-COVID-19-dans-le-contexte-national-Situation-et-scenarios_a2504.html