قيادي في "البي جي دي" ل"كود": حكومة "وحدة وطنية" كلام خاوي راه حنا ف حرب.. ولشكر مبقا تاحد كيسمع ليه

قال قيادي بارز في حزب "العدالة والتنمية" وعضو الأمانة العامة لحزبه، ل"كود" إن "مطلب حكومة وحدة وطنية كلام خاوي".
القيادي في البي جي دي أوضح ل"كود" :"شكون دق على ادريس لشكر وشكون سولو بلي المغرب محتاج حكومة وحدة وطنية "، مضيفا "شنو واقع فالبلاد بالسلامة باش نهضرو على وحدة حكومة وطنية، حنا عندنا أزمة صحية ماش أزمة حكومية ولا سياسية".
واتهم المصدر نفسه لشكر ب"الهروب إلى الأمام"، بالقول :"عندو ازمة داخلية وكيكسيري للقدام ولكن راه تا حد مبقا كيسمع ليه".
وتابع المتحدث :"حشومة هاد لكلام يصدر زعيم حزبي فهاد الوقت خصوصا ولات ترجع الثقة للمؤسسات وناس فرحانين بالمبادرات لي دارت الحكومة منها باش توصل المساعدات ل5 مليون أسرة ماشي ساهلة وباش لمغرب يولي يصدر الكمامات ماشي ساهلة".
وخاطب القيادي البارز فالبي جي دي لشكر بالقول :"غير قولينا شنو غادير ف حكومة وطنية، علما أن جميع الاحزاب معارضة وأغلبية كينوهو بالاجراءات اللي تخاذو وكينوهو بأداء الحكومة".
وتابع المصدر نفسه :"بالعكس اليوم رجعت الثقة فالمؤسسات وكولش كيهضر على تدبير المغرب للجائحة بقيادة الملك".
وشدد المتحدث أن "حكومة وطنية ماشي وقتها ثم ليس هناك مطلب شعبي أو توجه للرأي العام"، مردفا "في الدول لي فيها أزمة بين الحكومة والمعارضة بحال فرنسا واسبانيا وامريكا، مكاينش اجماع، وتما تا حد مطلب بحكومة وطنية ولا بانتخابات مبكرا وو، لأنه في عز الأزمة صعب دير حكومة جديدة لأننا في حرب".