7200 مغربية مشاو يخدمو فالفلاحة حاصلات. فيهم حاملات وباش قلبات عليهم الخارجية ديالنا راسلو ملك الصبليون

من ضمن 9000 عالق فإسبانيا، كاين 7200 عالقة من العاملات الموسميات فالضيعات الفلاحية، واللي كانوا خدامين ف"ويلبا"، ودابا تسالى موسم جني الثمار وبقاو واحلين تماك.
هاد العالقين مكتهضرش عليهم وزارة الخارجية، حقاش هي مهتمة أكثر بالناس لي عندهوم فيزا قصيرة (سياحة-علاج...)، أما اللي خدامين مازال ماعليهمش الهضرة رغم أنهم كيعيشو وضعية صعبة بزاف.
"كود" تواصلات مع عدد من هاد العاملات الموسميات، واللي أكدو ليها أنهم واحلين وفوضعية هشة بزاف، وباغيين يرجعو لبلادهم، خصوصا أنه كاين بينهم حوامل، وخاصهم يولدو بين حبابهم وأسرهم.
مصدر من قطاع المزارع، قال ل"كود"، أنهم راسلو المؤسسة الملكية الاسبانية، وواعداتهم أنها غادي تحاول تتدخل باش تلقى حل لهاد الفئة اللي كتعاني.
في ذات السياق، راسلات هيئة التنسيق الوطنية للجمعيات النسائية، اللي كتنضوي فيها أربع جمعيات، راسلات وزير التشغيل والادماج المهني، بخصوص وضعية هاد العاملات.
المنظمات النسائية شرحات وضعية النساء تبعا لما ورد في منابر اعلامية، وطالبات وزير الشتغيل باش يتدخل لتسهيل عودة هاد النساء لوليداتهم، خصوصا انهم ضربو تمارة فالحقول.