روبورطاج: العيون فاليوم اللول من رفع الحجر التدريجي.. الناس عانقات الحرية والحركة رجعات للإدارة والشارع والساحات والرهان الحقيقي على المرحلة الجاية -تصاور

بعد رفع الحجر بشكل تدريجي عن جهة العيون لي كتدخل فتصنيف المنطقة 1، دارت "كود" جولة فجميع شوارع وأحياء المدينة وشافت الحياة بحالاش رجعات ملي تحيدو السدود الأمنية وتلغات شهادة التنقل لي كانت ضرورة باش دوز الباراجات.
وبدينا جولتنا بأهم الإدارات فالمدينة لي بدات الخدمة اليوم، وبدات فاستقبال المواطنين، بشكل وقائي حيث كتفرض دخول نسبة قليلة، مع ضرورة ارتداء الكمامة واستعمال المعقمات، قبل الدخول بعدما كانت هاد الإدارات سادة الأبواب ديالها وكتخدم عن بعد بواسطة الأنترنت.
وفي جولتنا الصباحية أيضا، أصبحت الحياة بحاضرة الأقاليم الجنوبية تعود رويدا رويدا لأهم الشوارع الرئيسية بالمدينة، كشارع مكة وشارع السمارة وساحة الدشيرة، حيث دبت الحركة بشكل ملحوظ في أول يوم يرفع فيه الحجر بشل تدريجي.
وخلال هاد اليوم لي خرجات فيه الناس بعد ثلاثة أشهر من الحجر والالتزام داخل المنازل، توجهنا الى المحطة الخاصة بطاكسيات، ولاحظنا فرحة وخا غير تامة على وجوه الشوافير لي استبشرو خيرا بهاد القرار، رغم انحصاره مبدئيا داخل نفوذ الجهة، إلى حين تعميم نطاق العمل بجهات الصحراء + جهة سوس.
تجار الأسواق وأرباب المحلات بأكبر الأسواق فالعيون، كانوا حاسين بصعوبة المرحلة، وتجاوبوا بشكل إيجابي مع تعليمات السلطات المحلية بالمدينة، حماية لهم ولعائلاتهم وللمواطنين كذلك، وقضية لمش والفار ماكانتش خلال هاد الفترة ديال الأزمة، يروي أحد التجار ل"كود".
على العموم الحياة تبدلات بشكل ملحوظ بالعيون، وبانت صراحة فالصحرا قيمة الحرية وعدم تقييد الحركة لي جات دون سابق إنذار ومن عدو مجهول، ولكن قرارات الدولة ويقظة المسؤوليين، خلات المواطنين فجهات الصحرا بشكل خاص، يحسوا بنعمة الأمن والسلطات الأمنية لي دارت فوق جهدها باش تحافظ على مكتسب عدم انتشار الوباء، وفقدان السيطرة على انتشارو.

ورغم هاد شي، فإن الانتصار على الفيروس مازال ماوقع، وخا جهات العيون والداخلة ووادنون قراب يعلنو صفر حالة إصابة بكورونا، ولكن هاد شي لا يعني الاستهتار والتراخي فتحمل المسؤولية وعدم النظافة، وعدم ارتداء الكمامات، جيث نقدرو نضربو كلشي فزيرو ورجعو للمنطقة 2 ، ويرجع الحجر كيفما كان هاد 3 شهور.
دابا العيون سالات من المرحلة الأصعب وبدات مرحلة جديدة أقل صعوبة، ولكن ماخاصهاش تتغلب علينا، وماخاصناش صراحة نضربو المجهودات لي دارتها السلطات المحلية والأمنية وقوات مساعدة ودرك ملكي ووقاية مدنية وجيش ومصالح الجماعات وبعض المصالح الأخرى، فزيرو وتمشي حتى مجهوداتنا والتزامنا طوال هاد الفترة فالخوا الخاوي.