مع ظهور حالات اغتصاب لقاصرين فالمغرب واستغلالهم جنسيا، كيروج هذ الأيام بشكل كبير على مواقع التواصل الاجتماعي، وخصوصا ف"فيسبوك" ،و"أنستكَرام" وتطبيق "واتساب"، مقتطف من حلقة ببرنامج "منطقة محظورة" اللي كتبثو قناة "تيلي ماروك"، كيحمل تطبيع صريح مع ثقافة الاغتصاب. الفيديو دار ضجة كبيرة على مواقع التواصل الاجتماعي، والناس استنكرو الخطاب اللي فيه، بحيث واحد من ضيوف حلقة هذ البرنامج، واللي هو طبيب نفسي وأخصائي فالجنس ومحلل اجتماعي، اعتبر الاغتصاب "غريزة جنسية غير مهذبة"، وماشي جريمة، وقال بللي المرأة هي المسؤولة الأولى على هذ الفعل اللي كتتمارس عليها. وفرابط غير منطقي بالبت والمطلق، اعتبر المتحدث، فحلقة البرنامج التلفزي اللي دازت فشهر يناير، وجات بعد فيديو "المغتصب هو نتا" اللي داروه مجموعة من النساء، بللي امتناع المرا عن الزواج، وتفكيك الأسرة من خلال طلب المرا لحريتها، هو اللي كيخلي الاغتصاب يكثر. مجموعة من المعلقين الافتراضيين اعتبرو بللي ماخصش يتم بث بحال هذ الكلام "الخطير"، اللي فيه ميز واضح ضد المرأة، وهضم لحقوقها، وتطبيع صريح مع ثقافة الاغتصاب، وتحميل مسؤولية الحفاظ على الأسرة وتربية الأبناء للمرا بوحدها، وهذشي حسبهم يستدعي التدخل العاجل ديال الهيئة العليا للاتصال السمعي البصري "الهاكا". لكن معروف أن "الهاكا" مكيمكنش تتدخل فمحتوى قنوات بحال "تيلي ماروك" بحكم أنها كتبث من الخارج، وخارجة على لازون اللي كتتاخد فيها "الهاكا" قراراتها وعقوباتها، وعلى هذشي يمكن ما تدخلاتش فهذ الموضوع، واخا من دورها تحارب الميزوجينيا والصورة النمطية المتداولة فوسائل الإعلام السمعية البصرية على المرأة. http://chng.it/PfbywHkp نشطاء خرين دارو عريضة إلكترونية كتحمل أكثر من 16 ألف توقيع، كيطالبو فيها باش يتمنع هذ الطبيب من الظهور فالإعلام، باش ينشر أفكار كتشجع على الاغتصاب، وكترد المرا مسؤولة عليه، واخا هي الضحية الأولى دهاذ العمل الإجرامي اللي كيعاقب عليه القانون، وإدانتها عمرها ماغادي تنقص من هذ الجرائم، بل غتساهم فتفاقمها. قناة "تيلي ماروك" خرجات على الصمت ديالها، ودارت بلاغ كتعتذر فيه على داكشي اللي قال هذ الطبيب، وقالت انها ديما مع الحرية والمساواة والعدالة، وكتنشر الوعي والانفتاح... وكتآمن بللي المرا حرة فقراراتها اللي كتخص حياتها الخاصة والمهنية، وهذ الحرية عمرها تكون سبب فالاعتداء على كرامتها". وعلنات القناة على أنها ماعمرها تبنات آراء الضيوف اللي كتجيب، وكشفات أنها سحبات هذ الحلقة من جميع منصاتها الرقمية.
