ثلاثة شخصيات جابوها فالتسعين هاد السيمانا . وزير وقنصل ومدير اذاعة. الاول الوحيد اللي كيجيب مشاريع فيها مناصب شغل فهاد الحكومة والثاني خربق صبانيا بايام الداخلة والثالث جاب الربحة ب2 قنوات واذاعة

فهاد الوقت كاين اخبار بزاف فيها ما كيفرحش. ما عندناش اللي يحمر لوجه ولا كاين ولكن ماشي بنفس العدد اللي كيكحل وجه لبلاد. نهاية هاد الاسبوع بانت ثلاث شخصيات دارت خدمة مزيانة. مزيانة للبلاد. مزيانة للمورال. مزيانة للاقتصاد للاعلام للديبلوماسية.
الاول هو وزير الصناعة والاستثمار والتجارة والاقتصاد الرقمي مولاي حفيظ العلمي. البارح وقع مع وزير المالية والاقتصاد محمد بوسعيد ونائب رئيس “سيتيك گروب كوربورايشن” واللي كيشغل رئيس “ستيك ديكاستال” الصيني كزو زويو “استثمارية بين المغرب والمجموعة الصينية “ستيك ديكاستال”. هاد المشروع الصناعي لإنتاج إطارات العجلات من الألمنيوم كلف 350 مليون أورو، وغادي يخدم 1200 مغربي.
هاد المشروع ضمن مشاريع اخرى كتخص عالم الطونوبيلات خدمها منذ سنوات مولاي حفيظ العلمي. وزير جاب الخدمة للمغاربة فوقت كيفقدو فيه بزافت مناصب شغل نتيجة اخطاء كيقومو بيها زملاء اخرين ليه.
وزير فيه الضو مع اخرين فحكومة ناقصها الانسجام وكلها وايقاعو فالخدمة. كاين اللي غادي ب100 كيلومتر فالساعة وكاين اللي ما فايتش 60.
الرجل الثاني هو قنصل المغرب فالخزيرات فالجنوب الاسباني عبد الفتاح اللبار. القنصل شعل الصبليون باش دار اسبوع الداخلة فطوري مولينوس بكوستا ديل سور. قنصل بداها بانشطة ثقافية الصيف اللي فات وهاد العام قلبها سياسة وحضر رئيس جهة الداخلة الخطاط ينجى وعدد من المنتخبين. تصورو الداخلة فاسبانيا اللي فيها بزاف داعمين متطرفين للبوليساريو. ناضت القيامة واستاطع عمدة المدينة يتراجع عن احتضان انشطة ففضاءات تابعة للبلدية باش يسكت المعارضين ولكن بخدمة القنصل وبدعم حتى هاد العمدة اللي عطى الله عطاه. جزء من اسبانيا كيعتارف بمغربية الداخلة. غير هادي كافية. قنصل بامكانيات قليلة مضوي اسبانيا. مجهل بوديموس وكاع داعمي الانفصال اللي بزاف.
الرجل الثالث اللي دار شي حاجة ايجابية بزاف هو يونس بومهدي باطرون “هيت راديو”. الهاكا عطاتو رخصة باش يطلق اذاعة كتبث من الصحرا وجوج قنوات فضائية وحدة للاطفال والثانية للوثائقي. فهاد الوقت ياخد هاد العدد من القنوات حاجة ايجابية من باطرون كيخدم وقدر يدخل لافريقيا وديما جايب الجديد. جيل جديد مختلف فهاد الميدان اللي كيعاني