فينك يا بوريطة علاش غبرتي؟ الصبليون يقدرو يفتحو حدودهم معانا ف1 يوليوز ووزيرة خارجيتهم كتطنز علينا: ما تسافروش الا لسبب مهم

وزيرة خارجية اسبانيا لايا گونزاليث خرجات صباح هاد اليوم فالقناة الاسبانية "الاولى" باش تؤكد ان فتح الحدود كتحكم فيه الوضعية الوبائية ماشي الديبوماسية الوزيرة هدرات على عملية مرحبا هاد العام. جبدات كلام وزير الخارجية والتعاون ناصر بوريطة اللي قال فالبرلمان باللي هاد العام ما غادياش تكون عملية العبور كيف فالسابق. واوضحت ان اسبانيا ما غادياش تستقبل اكثر من 3 مليون مغربي كل عام كيدوزو من اراضيها وان هاد العام ما كايناش عملية عبور المغاربة من اسبانيا.
الوزيرة ذكرات باللي الحدود المغربية مازال مسدودة بسباب كورونا فيروس وهنا زادت جملة غريبة وجهاتها للمغاربة "ما تسافروش ايلى ما كانش هاد السفر مهم". دولة جابت كاع المشاهير ديالها باش تسوق للسياحة فيها هاد الصيف وملكها بدا جولة على كاع الجهات لنفس الغرض وكتعطي النصائح للمغاربة ما يمشيوش لبلادهم بهاد الطريقة. غريب هاد الشي
فين هاد وزير خارجيتنا؟ فين هاداك اللي كيترطى مالو غبر.
وفي موضوع ذي صلة٬ افادت "الباييس" الاسبانية ان الاتحاد الاوربي فيه نقاش كبير على لائحة الدول اللي ممكن مواطنيها يدخلو لدول فضاء شينگن. هاد الشي فيه بالاساس حسب اليومية٬ "الوضعية الوبائية فكل دولة". واكدت ان هناك حدود غادية تفتح لاسباب سياسية او جغرافية =القرب= وان هاد الشي ممكن يوقع بلا ما دير شي دول "المعاملة بالمثل". واعطت مثال لاسبانيا والمغرب. مدريد ممكن تفتح حدودها مع الرباط ففاتح يوليوز من طرف واحد واخا بلادنا مازال ما فتحاتش هاد الحدود.
وبررت هاد الشي بنسبة المصابين القليلة اللي كتقلل نقل الفيروس من المملكة للجارة الشمالية