سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
اشياء كثيرة فاسدة فمملكتنا ماشي غير شيء واحد. كيفاش قضاء الدولة اختار احكام مقودة صادمة ب300عام ضد ابناء الريف بالتزامن مع وصول ابطال الريف فالمونديال بحال امرابط واحمدي وزياش اللي حركو 11 الف مغربي من هولندا يشوفهم فروسيا
صدمة فالمغرب. صدمة من احكام صدراتها المحكمة وحتى حد ما قابلها من غير القاضي اللي طلقها وشي عدد قليل باغيين الخدمة فالريف. اللي كيدافعو على الدولة ليل ونهار فالفايس وغيرو تصدمو. تصورو اكثر الممخزنين تصدمو. احكام كارثية فقضاء عارفينو ماشي نزيه ماشي بشهادة غير الجمعيات الحقوقية الاجنبية بل حتى عندنا. الصدمة على توزيع اكثر من 300 عام على اولاد الريف. حراكهم دار ما يسمى بزلزال سياسي واتضح انه انتقائي وصافي ضرب شي وزراء دون اخرين. تعدى على التقدم والاشتراكية بسبب تحالفه مع العدالة والتنمية وفلت حتى شي وزراء فالحزب الاسلامي بحال عزيز الرباح اللي كان وزير النقل حقاش لعب دور كبير فترتيب الانقلاب على بنكيران لصالح بن عرفة. كلشي سياسة. الياس العماري اللي عندو دور كبير فهاد الحراك تجازى حتى حد ما قرب منو. يعني كلشي عبث فعبث. دابا هاد الاحكام اللي صدمات لمغاربة. عكرات ميزاجهم لمقود اصلا بعد فرحة محدودة فالزمن بسباب بطولية المنتخب المغربي في المونديال واخا تقصى. هنا كاين الصدمة والاصرار على الاذلال والتحدي. هاد القاضي اللي صدر الاحكام وعارفين خروب بلادنا مزيان ما ختار غير البارح الثلاثاء 26 والاربعاء 27 يونيو 2018 باش يصدر هاد الاحكام. ما اختار غير نهار اللي وصل فيه المنتخب المغربي لكرة القدم اللي شارك فالمونديال للمغرب باش يصدم هاد الشعب. واش حنا فين. راه لمغاربة اللي عبرو على فرحتهم وللي مشاو للمونديال واللي تفرجو هنا بمقدار هاديك الفرحة حتى بالغبن. بالحگرة. هاد الشي كتعبر عليه التعاليق ديالهم العفوية. اللي ما متسيشاش. ما كنهدرش على هادوك اللي مسيسين وديما ضد الدولة اللا. على مواطنين باش الحاجة تكون زوينة كيقولوها وباش كتكون خايبة كيقولوها وكيدافعو على المشترك بيناتنا وبقوة. الصدمة كبيرة حقاش اولاد الريف اللي فرحونا فالمونديال بحال امرابط اللي بان بحال شي گلادياتور كيقاتل وزياش واحمدي تصدمهم بهاد الاحكام. تصدم كاع الريف وكاع المغرب بهاد الاحكام. غير من هولندا بوحدها حضر فماتش المغرب البرتغال 11 الف هولندي من اصل مغربي. مع لبلاد اللي تهلات فيهم وقراتهم وخدماتهم وما كيتشدهمش فالحباسات بتهم بحال تهم ابطال حراك الريف٬ ما كيتحركوش ليها. نجوم المنتخب الهولندي كلهم دعمو المنتخب ودولتهم رغم العلاقة القوية جدا جدا جدا مع امريكا صوتات للمغرب في المونديال. رغم هاد الشي كولو يكون احكام قاسية بهاد الشكل على اولاد هاد المنطقة اللي عايشة بصفة كبيرة من تحويلات هاد المهاجرين. منتخب ما لقاش الدعم “السياسي” فالمغرب ما تم استقبالو وحتى فالماتشات ما حضر لا رئيس الدولة كيف وقع فدول افريقية وغير افريقية مشاركة ما حضر الحكومة الا فالماتش الاول حقاش كان يمكن يحضر ولي العهد وجا وزير الشبيبة والرياضة. منتخب فماتش البرتغال اللي حضر فالمنصة الشرفية هو رئيس الفيفا ورئيس البرتغال وفوزي لقجع رئيس الجامعة حقاش ما كان حتى حد. تقاتلو وضاربو بامكانياتهم. بلعابة من الريف ومن غيرو ولكن النجوم كانو من الريف فهاد المونديال ماشي من العدل تضرب اولاد عمهم اولاد بلادهم بهاد القسوة بهاد الاحكام الخايبة الكارثية. نور الدين امرابط المغربي الريفي تصاب بارتجاج فراسو وقال لرئيس الجامعة الملكية لكرة القدم فوزي لقجع 24 ساعة٬ كيف نقلاتها “كود” فوقت سابق “ايلى وقعات لي شي حاجة تهلى فالواليدة”. اي ان السيد داخل للمعركة فيها حياة او موت على توني لبلاد. على علم لبلاد. تعطي لناصر الزفزافي 20 عام فبداية الصيف واجميجق نفس الحكم وووو حشومة وعار. الريف من الحراك ما عمرو برد. هاداك اللي كتشوفوه غير واجهة. راه كيغلي. كيغلي على اللي شاف على اللي عاش. الجرح كبير غير كيتوهمو شي وحدين باللي بدا. عائلات كثيرة ولادها تشدو او تحكمو من هادو. منطقة كلها مخزنة فذاكرتها اش وقع خاصة الاطفال اللي كانو محركين بزاف فهاداك الحراك. الجيل الحالي قمعناه والجيل اللي جاي حتى حد ما يمكن يتوقع كيفاش يتصرف. كاينة امور كثيرة فاسدة فهاد المملكة. حتى قضية العفو الملكي بعد هاد التخربيق كولو ما غادياش تحل المشكلة ممكن جزء منها وصافي. هاد الشي ماشي فسد راه غماج. الفضيحة ان اللي بعض من المسؤولين عليه بشكل مباشر عايشين وخدامين وكأن شيئا لم يكن احكام قاسية تلك التي تلقاها الحاضرون في محكمة الاستئناف، والتي تراوحت بين عشرين سنة لاربعة معتقلين وخمسة عشرة ينة لثلاث معتقلين والبقية عشرة سنوات وخمس سنوات وسنتين وسنة. الاحكام اثارت الحاضرين الذين دخلوا في احتجاج داخل وخارج المحكمة. ناصر الزفزافي عشرين سنة نبيل احمجيق عشرين سنة ربيع الابلق خمس سنوات محمد جلول عشر سنوات محمد المجاوي خمس سنوات لشخم عشر سنوات اغطاس سنتين محمد الهادي ثلاث سنوات الحمديوي ثلاث سنوات انس الخطابي واعماروش وعبد المحسن اتاري سنتين عمر بوحراس عشر سنوات فاحيلي خمس سنوات ابقوي خمس سنوات اليخلوفي عشر سنوات جمال بوحدو خمس سنوات الاخوين بوزيان والنعيمي ثلاث سنوات لحبيب الحنودي خمس سنوات سمير اغيد عشرين سنة قدوري سنة سجنا محمد بوهنوش 15 سنة زكرياء ادهشور 15 سنة محمد الحاكي 15 سنة بلال اهباض عشر سنوات لشخم عشر سنوات محمد الاصريحي خمس سنوات
