الصحافة هو القطاع الوحيد اللي الخدمة تزادتو بزاف بزاف ومداخيلو صفر. صحف ورقية كتخسر 250 مليون فالشهر باش تخلص موظفيها بلا ما دخل والو. الدعم خاصو يكون اليوم وماشي على لوراق يمشي لرواتب الصحافيين

الحكومة دارت خطأ كبير باش قررات تمنع نشر وتوزيع الصحف الورقية. قلناها ونعودوها. مسؤولون فقطاع الاتصال قالو ل"كود" باللي كانت هادي رغبة بعض الناشرين ووصلوها ودافعو عليها من التحت. الناشرون اللي ما داروش لحد الان رد واضح على هاد القرار الغبي. كانت ردود فردية ماشي رد جماعي٬ كانو منقسمين لفئة ما كتبيعش بزاف ولقاتها فرصة تتخلص من الطباعة وفلوسها والتوزيع وصداعو وكاين فئة اخرى كانت ضد هاد القرار ورفضاتو. اشهر اليوميات الوطنية والصحف الاسبوعية اللي كتقرا والمجلات الشهرية اللي عليها اقبال كانت ضد قرار الحكومة تقريبا. بعض هاد اليوميات وفق مصادر "كود" كتخسر شهريا 250 مليون سنتيم على الرواتب وما وقفاتهمش على اللي معاهم. دارتها الشهر الاول وممكن ديرها هاد الشهر ولكن من بعد كلشي غادي للافلاس. حقاش المورد الاساسي اللي هو الاشهار وقف. ما بقاش. حتى اللي مروجين الحركة بحال الاسواق لكبيرة وشركات الاتصالات ما بقاوش كيديرو الاشهار واللي بغاه باغيه فابور واخا هما اللي ترفحو فالازمة الحالية.
اذن الحكومة هي اللي ساهمات فضرب قطاع الصحافة المكتوبة. دابا مع كورونا فيروس القضية غادية تطوال. واخا المغرب يخرج من حالة الطوارئ الصحية وباين هاد الشي غادي يطول مع الاعلان اليوم على 225 حالة جديدة٬ راه صعيب يكون اقبال على الصحف الورقية حقاش غادي يبقى الخوف من العدوى من هاد الفيروس القاتل.
الحل اليوم اش نا هو؟ كاين اللي كيطلب باش يخرج الدعم السنوي ويتوزع اليوم على الصحف. هادا فيه مشكل كبير وغالبية الصحف الالكترونية غادية ترفضو لسبب بسيط حقاش الدعم كيف كان كيداع كيكون على الورق. دابا الورق ما كاينش اذن الدعم خاصو يكون على الرواتب.
كاينة فكرة ان هاد الدعم من الاحسن يمشي لرواتب الصحافيين. بهاد الشي غادي يكون تخفيف كبير على المقاولة الصحافية.
المواطن المغربي وقبلو الدولة المغربية محتاجين للاعلام المغربي. شفنا كيفاش كاين اقبال كبير بزاف على القنوات المغربية. على "دوزيم" على "ميدي 1 تيفي" على اخبار وكالة المغرب العربي للانباء على الاذاعات المغربية الخاصة على المواقع الاخبارية المغربية. يعني كاين استهلاك كبير للمحلي. ما كاين غير المحلي.
الاعلام داير خدمة كبيرة بزاف فهاد الفترة. مجهود كبير بزاف ولكن مداخيلو اللي كانت فالسابق من الاشهار نعادمت.
فاسبانيا قررات الحكومة دعم الاعلام المرئي الخاص ماشي العمومي حقاش العمومي كلشي موفر ليه٬ ب15 مليون اورو. بلاد عايشة مأساة انسانية مع كورونا فيروس وازمة مالية خانقة دعمات هاد القطاع الحيوي. دعمات التنوع. دعمات الحرية. دعمات الاختلاف. المغرب خاصو يدعم القناة الثانية وميدي 1 تيفي وطبعا قنوات الشركة الوطنية للاذاعة والتلفزيون والاذاعات الخاصة والاعلام المكتوب ورقي والكتروني اليوم قبل غدا
لحد الان ما كاين والو. خاص تحرك. ايلى المغرب خسر الاعلام خسر معركة "كورونا فيروس" وغادية تكون مقدمة يخسر سيادتو بمعناها الشامل.
التمغربيت اللي عبرو عليها لمغاربة فالمساهمة فصندوق ضد هاد الجايحة بينات الحاجة لكل ما هو مغربي. لاول مرة لمغاربة سدو عليهم الحدود بصاح وغاديين يحلو مشاكلهم بيديهم بلا مساعدات. ها علاش الدولة محتاجة للاعلام كثر من حاجة الاعلام للدولة فهاد اللحظة التاريخية. غير بالقاء نظرة بسيطة كيفاش حاربات الدولة "الفايك نيوز" تعرفو اش كيتسنانا اليوم وغدا.