رحلة البحث على جوج "تيست" فرضاتهم الحكومة للي بغى يدخل للبلاد. يستحيل يدارو ف48 ساعة والسريع خاصو 3 ايام وبالموعد وثمنهم 40 الف ريال

شي مغاربة صدقو بيان الحكومة البارح اللي جا فيه باللي للي بغى يدخل لبلاد وعندو الجنسية او الاقامة خاصو يعطي قبل ما يطلع للطيارة "اختبار الكشف (PCR) لايقل عن 48 ساعة" واختبار "سيريولوجي". الاول على واش فيك كورونا فيروس دابا والثاني واش دازت فيك وكيف دايرة الانتي كور عندك.
شي وحدين نقلو ل"كود" تجاربهم. نبداو بناس ميريكان. هاد لمغاربة ما فهمو والو حتى هاد التيست "سيريولوجي" ما عندهم كاع. بمعنى ان المغرب ما غاديش يخليهم يدخلو. الدولة ديالهم ما بقاتش كيديرو.
ندوزو للتحليل الاول "بي سي ار" هاد التحليل ثمنو اولا فاسبانيا 120 اورو اي كثر من 26 الف ريال= حسب صرف الاورو مقارنة بالدرهم= وخاصك رحلة باش ديرو. تتصل وتاخد موعد وتسنى وقتاش يعيطو عليك ثم تجي ديرو وتقدر تسنى كثر من 48 ساعة كيف قالت بعض المختبرات لشي مواطنين مغاربة هاد الصباح ونقلوها ل"كود". يعني هاديك 48 ساعة لللي قالت الحكومة ما يمكنش تتحقق.
التسيت لاخر "سيريولوجي" معقد حتى هو. خاصك طلبو وتسنى على الاقل 72 ساعة اي 3 ايام و3 ليالي. ثمنو 58 اورو. اي شي 12 الف ريال.
المجموع ديالهم شي 40 الف ريال. اللي كاين عندو الاقامة وعندو التأمين ممكن يتكلف بيهم التأمين ولكن اللي حاصل بحال اكثر من 30 الف مغربي خاصهم يخلصوها من جيوبهم.
دابا ايلي درتيهم بجوج عاد قلبتي علي التذكرة غادي توحل. ممكن ما تلقاها ويمشي ليه لفلوس.
دابا واش هاد الحكومة اللي دارت هاد البيان بهاد الشروط ديال الخزيرات وبهاد الغموض تستحق تكون حكومة.