بسباب قرار الداخلية فعز أزمة كورونا والعيد.. السلطات قطعو الطريق بين ورزازات وزاكَورة.. وماحلوها حتى احتجو الناس – فيديو

الناس قطعو كيلومترات على رجليهم باش يشاركو فاحتجاجات حدا بارييرات قطعو بيها الجدارمية الطريق بين ورززات وزاكَورة.
هذا الباريار ساهم فشل حركة السير، وصفوفة طوال ديال الطوموبيلات بقات مبلوكية، وهذشي واخا قرار منع التنقل من وإلى المدن كيشمل 8 فقط، وورزازات وزاكَورة مامسوبينش فهذ القرار.
وحسب مصادر "كود" فهذ الاحتجاجات استمرات ساعات، وبدات مع السبعة ديال الصباح، الشي اللي خلا السلطات يفتحو الطريق لمئات الطوموبيلات والكيران اللي حاصلين.
ومن المرجح تكون الطريق مقطوعة على اعتبار أن البعض من هذ المسافرين جاو من مراكش، لكن كان على السلطات يديرو الباريارات قريب لهاذ المدينة، وماشي يخليو الناس حتى يشدو الطريق عاد يحبسوهم فالنص.
وقرار وزارة الداخلية اللي صدر لبارح، واللي كيمنع التنقل من وإلى مجموعة من المدن، أهمها كازا وطنجة ومراكش وفاس، خلق ارتباك كبير فالطرقات، وقعات فوضى ادات لحوادث خطيرة، بحيث الناس خرجو من مناطق مختلفة كيتسابقو باش يمشيو عند عائلاتهم يعيدو معاهمم قبل ال12 ديال الليل، وهو الوقت اللي غيولي القرار ساري المفعول، ولقاو راسهم حاصلين.