تحقيق قناة "ام 6" على الجزائر. شفرة وفساد وغش والثورة غدا او كيفاش تعامل هاد التحقيق بسطحية واثارة وبغى يجمع كلشي

حلقة على الجزائر دارها برنامج "انوكيت اكسكلوزيف" بالقناة الفرنسية "ام 6" اللي بثاتو البارح الاحد 20 شتنبر ما جابش الجديد. الجزائر تالفة دايخة كتقلب على راسها. دارت حراكها باش تشد الطريق. غير هو الطريق ماشي لا ساهل ولا واضح.
بحال كاع حلقات هاد البرامج فيه التعمار بزاف. سانساسيوينال كثر من اللازم. بغى يدير البوز قبل البث وهدر على حوايج كثيرة كيف مولف يدير.
ابطال هاد التحقيق بدا بالفرنسيين وسالى بالفرنسيين. فرنسيون سياح فمناطق زوينة ولكن كلشي مزير. ما يقدروش السياح يدورو براحتهم ومراقبهم البوليس باللباس ديالو او سيڤيل. دولة بوليسية يعني. وسالى بقضية الصحافي كريم زغيلش اللي تحكم عليه بعامين حبس اخر غشت اللي فات بتهم غريبة بالفعل بحال تخدم مع مؤسسة اعلامية اجنبية. جاب مقدم البرنامج مراسلون بلا حدود وفرنسيون اخرون يهدرو على حرية التعبير.
بين هاد الفرنسيين خلط هاد البرنامج كلشي. ابطالو شي من الحراك بحال شي يوتوبر محجبة مزوجة عندهم. بحال صحابات رويتيني اليومي ديالنا. من هاد الغباء رجع منو ثورة فعالم محافظ. فين الثورة؟ المقدم اللي عارفها.
ثم جاب جزائرية عادية كتخرج كتغني باش يهدر على التحرر. هاد البنت كتشارك فالحراك وعزيز عليها الموسيقى. داز على حكايات اخرى. واحد كيقلب على خدمة ولاعب بغى يكون كوايري وكيقول اه خاص تكون المعرفة باش تلعب. التخربيق وصافي. واش المنتخب الجزائري بحال المنتخب المغربي معول على اللعابة المحليين؟ اللا. العمود الفقري راهم ولاد هاد الدولتين اللي عايشين فالخارج.
مشاكل الشباب كيف ديما. التشوميرة. الرغبة فالحريك. الاستقلال. الزواج. الدار. الشقق المغشوشة. الاسلاميين اللي كيوجدو لغدا. كلشي داروه ولكن بشكل سطحي تقريبا. حاجة مثيرة هو السماح لحزب النور السلفي يدير ما بغى يقري الدراري الصغار كيف بغى. بحالو بحال هاداك السلفي المتخلف ديالنا المغراوي اللي مخلياه الدولة يقري ولادنا القرآن. كاين شوية الفرق وصافي.
برنامج دار البوز قبل باللي فريق خدم مع محليين ودار كاميرا خفية باش يصور وو ولكن فالاخير حلقة عادية. هادا راه دار حلقات على المغرب بنفس الاسلوب: الاثارة