الفيفا لاحت ملف الحدادي فوجه الجامعة وخاليلوزيتش تصدم.. والخلل إداري وما عندو حتى علاقة بالكرة ولقجع خاص يفتح تحقيق

الاتحاد الدولي لكرة القدم صدم اليوم الخميس الجامعة والمنتخب الوطني، فاش لاح ملف منير الحدادي.
"الفيفا" أكدت في ردها على الجامعة أن الحدادي ما يمكنش يلعب مع المنتخب الوطني كونتر السنگال والكونگو الديمقراطية رغم الطابع الودي لهاد الماتشات.
مصادر مطلعة أكدت باللي كانت أخطاء في لابروسيدور كيتحمل مسؤوليتها موظف اداري ما عندو حتى علاقة بكرة القدم ولا يفقه شيئا في تدبير ملفات من هذا النوع.
هاد الإداري فشل فشلا ذريعا في تدبير ملف الحدادي الشيء اللي خلا الفيفا ترميه في وجه خاليلوزيتش، اللي تحسر اليوم في اللقاء الاعلامي على عدم تأهيل هاد اللاعب.
خاليلوزيتش قال في تصريحات صحافية اليوم أن الحدادي كان غادي يقدم إضافة كبيرة للمنتخب.
دابا لقجع خاص يفتح تحقيق في هاد الشيء كامل، ويبحث فين هو الخلل وشكون المسؤول الأول فهاد الفضيحة، كيفاش الفيفا عدلات قانون تغيير الجنسيات الرياضية للاعبين وما قبلاتش ملف الحدادي، إذن كاين مشكل في "البروسيدور". ما طبقاتش كيفما ينبغي.
مشكل كبير إلى ضيعنا لاعب موهوب من قيمة الحدادي بخطأ إداري أو جهل بالقوانين من إداريين مهمتهم تدبير مثل هاد الملفات.
رآه خاص الرجل المناسب فالمكان المناسب واللي ما عندو حتى علاقة بالكرة يمشي الباسكيط، يقدر يدير شي حاجة. أما الكرة فخاصها مواليها. اللهم قد بلغت.