قطع رأس الاستاذ الفرنسي. تهديدات داعشية للتشكيلي مبارك عمان. داعشي اسمو حضري منير: قتل الاستاذ الملعون شهيد واللهم اكثر من امثاله والتشيكلي ل"كود": هادو خلعوني وخايف على راسي منهم

العملية الارهابية اللي ضربات فرانسا بقطع راس استاذ من قبل ارهابي شيشاني برهوش 18 عام٬ وصلات للمغرب. هنا كاينين دواعش باركو هاد العملية وهددو الفنان التشكيلي مبارك عمان.
التشكيلي قال ل"كود" باللي خايف على حياتو من خلال تدوينات فيها تحريض. الفنان قال "هاد التعليقات فاجئوني وخلعوني" واضاف ان مبعث هاد الخوف انو شاف باللي ما كيتسناوش التعاطف مع الضحية بالعكس اعتبرو العملية الارهابية ديال قطع الراس هو اللي كان خاصو يدار".
واستغرب الفنان التشكيلي فتصريحو ل"كود" "كيفاش كيتم رسم مقدسات مسيحية وغيرها بلا ما يكون رد فعل عنيف من اصحاب هاد الديانات. بلا ما يكون قطع الرؤوس كيف كيوقع مع اللي كيقرب شي فنان للاسلام.
الفنان قال ان الدفاع عن ارهابيين كيخلينا نفيقو ونعرفو باللي عايشين مع دواعش فمجتمعنا. هاد الشي اعتبرو خطر كبير علينا وعلى اللي عايشين فاوربا.
وكان التشكيلي دار تعليق على قطع راس الاستاذ من قبل الارهابي٬ فرد عليه شخص عندو حساب باسم حضري منير وكتب "قاتل المدرس الملعون هو شهيد عند الله واللم كثر من امثاله". رد عليه التشكيلي "انت داعشي؟" فعلق هاداك حضري "واش فخبارك هاد الكومونتير غادي يديك الحبس". هو كيدافع على قطع الرؤوس وكيهدر على الحبس. فخرج شي حد اخر باسم ايمنو ايمانيتو" ،كتب "لهنه الله عليك وخليك غارق فالفسوق والفحور ديالك اسي العلماني" ثم اضاف حضري منير "انا مسلم انتصر لديني ولرسولي" وباللي "ايلى جا الحبس" راه ما خايفش. واعتبرو التشكيلي "من انصار عصيد". يعني دمو مستباح.
دواعش بيناتنا وكثار