واش بصّح اسماء بوعشرين اعطات مليون لحنان بكور باش تعطيها لمايسة الناجي باش تدافع على الصحافي راجلها؟ مايسة غادية تدعيها بعد ما كذبات وبكور: مايسة جيتي فطريق حرب داخلية واسماء: للاسق ما عنديش مع هاد النزالات

نشر الموقع الاخباري "اش كاين" خبر فيه ان اسماء بوعشرين زوجة الصحافي توفيق بوعشرين عطات للناشطة فمواقع التواصل الاجتماعي مايسة سلامة الناجي مليون سنتيم باش دافع على راجلها. اللي كان الوسيطة هي حنان بكور رئيسة تحرير "اليوم 24".
الموضوع نوضها. "كود" هضرات مع مرات بوعشرين لكنها رفضها تعطي للموضوع أهمية. أسماء قالت ل"كود": "إذا كان هناك سوء فهم أو خلاف لا يحل في صفحات التواصل الاجتماعي او عبر اللايفات،، للاسف انا ماعنديش مع هاد النزالات".
وأضافت أسماء، في تصريح ل"كود"، قائلة: "الاستاذة ميساء ماعندهاش لاش تخبر الراي العام انها غادي تقدم شكاية وتطلب محامي... والأستاذة حنان ما عندي معها حتى مشكل لا داخلي ولا خارجي وهي صديقة قبل تكون مديرة نشر موقع اليوم 24. لنرتقي !!".
مايسة سلامة الناجي كذابت هادشي جملة وتفصيلاً، وقالت في لايف دارتو على صفحتها بالفايسبوك بأن هادشي كولو كذوب فكذوب وماشي من عادتها تدير هادشي على واحد مقبوط فالحبس وتبزنس.
وأضافت مايسة أن أسماء مرات بوعشرين عندها صراعات مع الصحفيين فاخبار اليوم بسبب الميزانية، مؤكدة: انا معندي علاقة بهادشي وميدخلونيش فهاد الصراعات ديالوم. معندي بها علاقة". الناشطة قررات تدعي اي واحد طيح عليها الباطل. دابا بدات الاجراءات القانونية
بدورها نشرت حنان باكور تدوينة على الفايسبوك، وجاء فيها: "اللي كيعتبر راسو عندو مشكل معايا ممكن يجي ليا مباشرة باش نرد مباشرة الضرب من تحت الحزام، اللي هو في الحقيقة ضرب فرقابكم، ليس حرفتي، أدخل كل المعارك التي أومن بها "فاص".. مايسة جيتي فطريق حرب داخلية تحولت لبؤرة متعفنة لطالما ترفعت على مد يدي فيها...".
وأضاف: "هناك من يريد جري وبقوة إلى الحضيض حتى ينفس عن عقده أو بالأصح عن عقدة أساسية حلها في الواقع بسيط للغاية...لكن مدمر! دفاعنا عن قضية زميلنا توفيق بوعشرين كان عن قناعة ولا يحتاج لغير إيمان بالقضية ولم ندفع لا لمايسة ولا غيرها...ومن يروج لهذا البهتان يسيء لتوفيق ولنفسه قبل أن يسيء لي. سأكتفي بهذا القدر...وأترككم في المنحدر".