وضربة يستحقها هاداك وزير الصحة الفاشل ايت الطالب ومعاه بنعرفة. كيفاش لقصر حيد ليه كلشي. لا تواصل لا لوجيستيك كلشي بيد الداخلية وباشراف مباشر من القصر

غير على بيان الديوان الملكي اللي خرج نهار الاثنين فالليل بعد اجتماع ترأسو رئيس الدولة٬ كان خاص وزير الصحة ايت الطالب يحشم ويغبر. بلا حيا بلا حشمة خرج كيهدر بالفرنسية كيخاطب فرانسا يمكن. اما لمغاربة لا هما عمرهم ثاقو فيه ولا هو عمرو احترمهم.
بيان الديوان الملكي على ترؤس محمد السادس لجلسة عمل خصصت لإستراتيجية التلقيح ضد كورونا فيه اش خاص يدار.
فيه باللي غادية يكون "إطلاق عملية مكثفة للتلقيح ضد فيروس كوفيد-19 في الأسابيع المقبلة"٬ وباللي الهدف من هاد العملية الوطنية الواسعة النطاق وغير المسبوقة "تأمين تغطية للساكنة بلقاح كوسيلة ملائمة للتحصين ضد الفيروس والتحكم في انتشاره. فحسب نتائج الدراسات السريرية المنجزة أو التي توجد قيد الإنجاز، فإن سلامة، وفعالية ومناعة اللقاح قد تم إثباتها".
لمغاربة اللي عمرهم كثر من 18 عام غاديين يديرو جوج الحقن من هاد الڤاكسان وباللي الالوية تعطى "الخصوص للعاملين في الخطوط الأمامية، وخاصة العاملين في مجال الصحة، والسلطات العمومية، وقوات الأمن والعاملين بقطاع التربية الوطنية، وكذا الأشخاص المسنين والفئات الهشة للفيروس، وذلك قبل توسيع نطاقها على باقي الساكنة"
حقاش هادي مبارة انخرط فيها رئيس الدولة وحقاش خاصها "الإعداد والسير الجيدين لهذه العملية الوطنية واسعة النطاق، سواء على المستوى الصحي أو اللوجيستيكي أو التقني. كما تم تسليط الضوء بالخصوص على الولوجية للقاح، في إطار اجتماعي وتضامني وتوفيره بكميات كافية، وكذا على اللوجيستيك الطبي للنقل، والتخزين وإدارة اللقاح على كافة التراب الوطني ووضع نظام ناجع للتسجيل القبلي للمستفيدين" وزارة الصحة ما تقربش للتنظيم. خدمتها فقط فالجانب المتعلق بالصحة وحتى هادا شوف تشوف
وزارة الصحة فهاد الشي وخاصة وزيرها الفاشل اللي ماديها فالاعفاءات ديال اطر الصحة٬ غادي يسمع ويطبق وصافي. حتى التواصل ماشي خدمتو. هاد الملف اللي بين فيه على فشل كبير طيلة ايام الجايحة غادي يتحيد من عندو.
دابا كاين اشراف مباشر من القصر وكاين تدبير لهاد الشي من طرف وزارة الداخلية وجابو وكالة متخصصة لهاد الغرض.
يعني ما بغاوش هاد العملية تفشل كيف فشل تواصليا هاد الوزير كل مبادارات الدولة سابقا
هادي ضربة ليه ولكن هو ما حشمش خرج ساعات بعد ذلك كيهدر بالفرنسية باش يخاطب لفرنسيس. تصورو وزير فشي بلاد يهدر على مشروع بحال هادا دارو الملك بالفرنسية واخا فجريدة محلية٬ باللغة الفرنسية. علاش. باش تفهمو عقلية هاد السيد.
قاليك حكومة الكفاءات. هادا كفاءة هادا. ودابا بهاد الشي اللي وقع خاصو يحشم على عراضو. اما الاستقالة ما كايناش خاصو غير الاقالة بطريقة مذلة. طبعا ضربة حتى لحكومة بنعرفة اللي فشلات فتدبير هاد الملف. بنعرفة اللي اصلا ماشي كفاءة ما يمكنش يدير حكومة كفاءة