البوليساريو حاصل وقيادتو اللي قتلات وغتاصبات وعذبات مشات مصداقيتها . الحرب باغيينها باش يوقفو الاحتجاجات فالمخيمات

من المتوقع تعلن قيادة البوليساريو اليوم نهاية وقف اطلاق النار اللي كتشرف عليه المينورسو واللي كان كيجمعها مع المغرب على خلفية طرد الجيش المغربي لناسها من الكركرات٬ منطقة عازلة حولاتها البوليساريو لمنطقة كتفرض فيها قانونها.
الجيش المغربي دار تأمين لهاد المنطقة باش الحركة التجارية تستمر مع افريقيا. دخل بعد فشل وساطة اممية وبعد رفض البوليساريو لدعوات كاع الدول باش يحشمو ويخرجو.
لكن علاش البوليساريو لعبات هاد الورقة. كاين اسباب داخلية واسباب خارجية.
اسباب خارجية مرتبطة بالنصر المغربي اللي حققو مؤخرا فالصحرا. دول كثيرة فتحات قنصليات فالعيون والداخلة. دول افريقية عضو فالاتحاد الافريقي. هادي ضربة للبوليساريو. للجزائر اللي كتحركها ولجنوب افريقيا الداعمة ديبلوماسيا ليها. ثم كان افتتاح الامارات العربية المتحدة ايام عيد الميسرة الاخير. ثم هاد القضية وقفات من نهار استاقل الالماني كوهلر المبعوث الاممي الخاص الى الصحراء. راه دابا اكثر من عام وما كاينش مبعوث للامين العام الاممي مكلف بقضية الصحراء. ما عمرها كانت من نهار بدا وقف اطلاق النار.
ثم جات ضربة اخرى للبوليساريو باش تقرر يكون تمديد عمل المينورسو٬ قوات حفظ السلام المكلفة بتطبيق وقف اطلاق النار بين الجانبين٬ الى سنة. كان واحد الوقت رجع 6 اشهر لكن مؤخرا ولى سنة.
جينرالات الجيش اللي فشلو اي تحرك ديموقراطي فبلادهم لعبو دور باش يشعلو البوليساريو اللي هي مونيكة فيديهم.
داخليا البوليساريو كيتغلي. المخيمات شعلات اكثر من مرة بالاحتجاجات. كاينة مطالب بالعيش الكريم بالحرية بالديموقراطية. جبهة البوليساريو تآكلات. ولات عبء عند جزء من اللي كيآمن بدولة فالصحرا. هادي اكثر من عامين وقعات عملية غير مسبوقة. شهادات حية خطيرة على جرائم قادة البوليساريو من ابراهيم غالي حتى الوالي مصطفى السيد... قتلو رجال ونساء واطفال واغتاصبو عيالات وعذبو عدد كبير واختاطفو وغبرو. شهادات كثيرة ديال هادوك اللي تعرضو للتعذيب عراتهم. وصلات الوقاحة حتى الوالي مصطفى السيد كيعتاذر. علاش الاعتذار ولمن. هاد الشي ما فيهش اعتذار.
كاع هادوك اللي دارو جرائم ضد الانسانية فحق صحراوا مازال فبلايصهم. مازال فموقع المسؤولية. هنا البوليساريو فقدات الشرعية. ولات عند جيل جديد عائق بعد ما كانت كتبان قائدة لحركة تحرر.
يعني هاديك اللي كيسميوها "الوحدة الوطنية" مشات.
لهاد الاسباب البوليساريو محتاجة لحرب. محتاجة لاستعادة "الوحدة الوطنية" كيف كيشوفوها. محتاجين للحرب باش يرجعو "الدينامية للقضية". محتاجين للحرب باش يخرجو من وضعية الجمود لوضعية جديدة.
هاد الشي محتاجاه على الجزائر. محتاجين لعدو خارجي وما كاينش ما حسن من المغرب باش ينسيو بلاد المليون شهيد كاع مطالب الحراك بالديموقراطية. باش يستمرو الجينرالات يملكو كلشي والشعب ينسى ويتلهى مع المغرب.
هاد الشي علاش البوليساريو غادية تبغي تمشي للحرب. غير هو واش قادرة عليها. الجيش المغربي مدرب. كل عام كيدير الاسد الافريقي وكيدرب مع الميريكان. كيدير مناورات وولاو ضباط جداد مدربين. البوليساريو ناقصاهم التداريب. اللي كانو محاربين قدام كبرو دابا. الجيل الجديد ناقصو كلشي. لا حماس لا تكوين لا تدريب.