غباء بوريطة. هاد لوزير شبعان عقد. كيفاش كيتعصب فحواراتو مع قنوات فلحظات تاريخية خاصنا نكونو ناشطين. هاد المرحلة ديال شخص اخر فالخارجية: رزين ما كيعرضش اللي حافظ ويدوز المشاعر فلغتو مرة مرة: عندنا ابو ايوب وهلال ...

وزير الخارجية والتعاون ناصر بوريطة بان فحوار مع شي قناة فوضعية كتثير الشفقة عليه. سولو على "اقامة علاقات ديبلوماسية كاملة بين المغرب واسرائيل" فالبداية حقاش عند لعرب هادا هو الحدث. عندنا حنا لمغاربة الحدث التاريخي هو اعتراف امريكا بمغربية الصحرا. الوزير عوض ما يكون وزير بصاح. بدا اللا ماشي هادا هو الحدث. الحدث هو اعتراف امريكا بمغربية الصحرا. هو هو هو هو.وبقى بحال شي ببغاء كيعاود.
اولا بان متوتر بزاف. بان ما راضيش بالتطبيع. علاش؟ راه الثمن اللي خدا المغرب كبير بزاف. الدولة ربحات. المصالح العليا ديالنا مع هاد الصفقة. انت وزير الخارجية راه خاص تكون فيك خصلة اساسية هي الديبلوماسية. باينة ما عندكش الذكاء الكافي باش دوز افكارك القاصحة فقالب ديبلوماسي وبالضحكة. باش كملها هاد لوزير جاب معاه اللي ما فيدهمش فالتواصل. يعني غادي يبنا كاملين للحيط. الدولة المغربية.فنفس الحوار بان مقعد.
عندو مشاكل كبيرة مع راسو اولا واخيرا. شوف نتنياهو اللي ما رضاش مع شاركوش الرئيس الامريكي ترامب فالتلفون اللي دارو مع الملك محمد السادس كيف قالت "اكسيوس"٬ ومع ذلك خرج فالتلفزيون مباشرة. كيضحك وكيشكر. دارها لبلادو ماشي باش يرضي غرورو. لبلاد محتاجة بزاف بزاف وزير للخارجية جديد او وزير منتدب للخارجية نوجدوه. الاعتراف الامريكي مغربية الصحراء واقامة قنصلية امريكية في الداخلة محتاجة لكاليبر اخر.
عندنا فالخارجية كالبيرات كبار. عندنا الديبلوماسي المثقف اللي النيفو عندو طالع بزاف حسن ابو ايوب. بحالو المغرب غادي يدوز لمرحلة اخرى. عندنا عمر هلال مندوب المغرب فالامم المتحدة. حتى باش كيضرب شي حد كيضرب بديبلوماسية. باناقة. كاين جيل جديد من السفيرات والسفراء. عارفين وعارفات القصر مزيان. اي عارفين وعارفات كيفاش يتعاملو. هاد الشي فانتظار الانتخابات التشريعية واللي خاص الخارجية ترجع للاحزاب السياسية ولكن يجيبو ليها ناس كبار ماشي بحال بنعرفة.المهم ان استمرار بوريطة فهاد الوزارة مع التحولات الجديدة كيعطي صورة سلبية للديبلوماسية. بحال ايلى حنا اللي خاسرين حنا اللي فموقف ضعف. باش كيشوفك العالم متوتر كيشوف باللي انت ما تايقش فراسك