نادية لارگيت مرات نور الدين الصايل كتوضح شي حوايج بعد وفاتو: تعطلنا فالدفين حيت تسنينا ولادو يجيو من برا ويدوز عيد ميلاد ولدنا الصغير.. وبلاصة المرا كاينة فالگنايز وماشي مهم تلبس البيض ولا الكحل – تدوينة

فقلب شعورها بالحزن على وفاة راجلها، الصحافي المقتدر ومدير القناة الثانية سابقا، نور الدين الصايل، دارت الصحافية نادية
لاركَيت تدوينة جديدة، كتوضح فيها مجموعة من الأمور من بعدما وصلوها رسائل على حيثيات موت راجلها.
بشأن تأخير الدفن ديال الصايل، وضحات لاركَيت أن هذشي كان بطلب منها هي، حيت طلبات مايتدفنش حتى يجيو ولادو من برا ويشوفوه، وكانو وصلو الأربعاء 16 دجنبر فالوقت اللي كان توفى هو ف15 دجنبر، لكن واخا هكذاك، بقات لاركَيت مصرة على تأخير الدفن، باش مايجيش متزامن مع عيد ميلاد ولدو سليمان، اللي قالت أنه باقي صغير، وغيصعاب عليه يتقبل أمر تزامن تاريخ دفن الأب ديالو مع عيد ميلادو، وهكذا تأخر الدفن حتى للجمعة 18 دجنبر فالصباح.
بالنسبة لحضورها لتشييع جثمان الزوج ديالها هي وولدهم سليمان، قالت أنهم كانو كاملين متحدين، وكانت حتى هي على اعتبار ان بلاصة المرأة موجودة حتى هي، سواء بالأسود أو الأبيض، ماشي مهم، اما حضور سليمان ف"كان اختيارو هو، الطفل كيحتاج غير للي يتكلم معاه، باش يكون صريح.
وعن انسحابها من مواقع التواصل الاجتماعي من 31 اكتوبر، اكدات لاركَيت ان هذشي ماعندو حتى علاقة بصحة الصايل، لكن لأسباب مهنية خلاتها تكون فحاجة للتركيز، وكشفات أن الصايل تهز للسبيطار بسبب فيروس كورونا ف1 دجنبر، وف15 دجنبر غيتعيط ليها الكبيب فالتيليفون، ويقول ليها أن راجلها مات بنوبة قلبية بسبب مضاعفات كوفيد 19.
وشكرات لاركَيت فتدوينتها الأطر الصحية فسبيطار الشيخ زايد، اللي قالت عليهم انهم دارو كَاع اللي فجهدهم، والصايلكان محاط بافضل الأطباء.. "ديما قال نور الدين أن الموت جزء من الحياة.. خاصنا نعيشو.. كنتمنى ليكم كل حاجة زوينة.. السابان دنويل واجد.. غيكون هذالعام مختلف لكنه زوين..."، هكذا ختمات لاركَيت تدوينتها.
https://m.facebook.com/story.php?story_fbid=801955127317376&id=100025086883651