وفين وزيرنا ايت الطالب اللي ما فيدوش ومعطل فكلشي. ها مصر وافقات على ڤاكسان "سينوفارم" اللي غادي ياخدو المغرب وبدات تعطيه لشعبها

وزير الصحة خالد ايت الطالب ما بينش فشلو فتدبير جايحة كورونا وصافي بل حتى فتدبير الڤاكسان. عقلتو وقتاش هدرنا باللي المغرب غادي يدير اللقاح ضد كورونا وباللي وجد ووو. طلع كلشي غير هدرة خاوية. دابا دول عربية بدات اللقاح الصيني او غيرو بحال الامارات وقطر والبحرين بل حتى مصر بدات.
وزيرة الصحة المصرية هالة زايد علنات عن ترخيص الاستخدام الطارئ للقاح الصيني المضاد "سينوفارم" ضد كورونا.
المسؤولة المصرية قالت باللي "هيئة الدواء المصرية" عطات تصريح طارئ لاستخدام لقاح سينوفارم. بل قالت باللي العملية غادية تبدا لناس الصحة فالسيمانا الثانية من هاد الشهر.
مصر بحالنا حتى المغرب فاختيار اللقاح الصيني والبريطاني استرازينيكا اللي غادي يوصل لبلاد السيسي اخر هاد الشهر.
دابا وزيرنا ما حاسبو حد. كاع اللي دارو وما حاسبينوش على قراراتو.