دورة جهة الداخلة دايرة روينة.. دا صحافيين للگرگرات يزوقو صورتو و ناوي يدعم جمعية دارت البارح ب 60 مليون

اليوم الإثنين 1 مارس كتنعاقد دورات المجالس الجهوية ف المملكة ومن بينها كاين مجلس جهة الداخلة وادي الذهب لي داير الدورة ديالو الحالية فالگرگرات.
هاد الدورة ديال المجلس الجهوي قسمات ناس الداخلة مابين مؤيد ومعارض، المؤيدين كيقولو هادا موقف وطني وعندو رمزية والدورة دارها المجلس فالگرگرات لتجسيد الوحدة الترابية للمملكة وتكريس السيادة الوطنية، حتى لهنا ما كاين باس.
الطرف المعارض وعلى الرغم من انه لا يعارض تنظيم هاد الدورة فالگرگرات، إلا أنه عندو بزاف ديال الملاحظات، ومن بينها كاينة الميزانية الكبيرة اللي تخصصات لهاد الدورة واعتماد المجلس الجهوي على الفولكلور والزواق والخيام، زايدون الناس لي استفادت من الصفقة عليهم كلام كثير خاصة وأن اللي خداها هو ممون حفلات تابع لحزب الإستقلال فمراكش يعني هنا ما كاينش شي حاجة سميتها دعم ولاد المنطقة لي عندهوم شركات قادرة دير بحال هاد التظاهرات.
هاد الدورة ديال مجلس جهة الداخلة دارت أيضا ردود أفعال كثيرة، بحيث ان رئيس الجهة الخطاط ينجا بغا يستعملها باش يزوق صورتو قدام الرأي العام وناض استدعى وسائل إعلام وصحافيين و تكلف ليهم بالتنقل ولوطيلات باش يجيو ويكتبو ليه لي بغا، وناض ايضا جاب شي وحدين ما عندهم علاقة بالصحافة ودخلهم للدورة ومنع آخرين معارضين من انهم يدخلو، بالإضافة لصحافيين آخرين محسوبين عليه فهاد الدورة.
النقطة لي زادت خلات الرأي العام ينتافض أيضا هي واحد الاتفاقية باغي يديرها رئيس الجهة، وهي عبارة عن دعم لواحد الجمعية ما عمر ناس الداخلة سمعو بيها، هاد الجمعية كيقولو انها ديال الصحافة وفيها صحافيين من التابعين له ومن بينهم لي ما عندوش حتى بطاقة الصحافة ديال المجلس الوطني و مجلس جهة الداخلة باغي يعطيهوم 60 ملبون سنتيم باش يزيدو يتقواو، و فيما يبدو، يخدمو الاجندة ديالو قبل الانتخابات المقبلة.