العبث بعينيه.. المواقع لي معنداش الملاءمة بغات تبقا خدامة فوضى.. وزارة الاتصال ل”كود”: ما كاين غير تطبيق القانون. مجاهد ل”كود”: ميمكنش نعلق على شي حاجة ماشي من اختصاصي

قضية البطاقة الصحفية غادية وكتسخن شويا بشويا. الصحف الإلكترونية لي ماعندهاش الملاءمة ما عاجبهاش الحال وباغية تحتج كاع. البارح الأربعاء خرج شي بيان غير موقع من هاد الفئة كيهاجمو فيه التصريحات الأخيرة لمحمد الأعرج وزير الثقافة والاتصال والسبب: بغا يطبق القانون. اي حجب المواقع اللي خارج القانون.
كيفاش أن الوزير داير خدمتو باش يصفي هاد القطاع ويجي وحدين يحتجو. حوايج كثار ما راكبينش . وحسب مقرب من وزير الاتصال ل”كود”، فإنه “لا تراجع على تطبيق القانون في حق المواقع لي معندهاش ملاءمة”. يعني غوثو ولا ما تغوتوش القانون غادي يكون.
وأضاف المصدر نفسه ل”كود”: “الوزير الأعرج قطع أشواط كبيرة وتحارب بزاف باش القطاع ديال الاتصال يرجع فيه الضو شويا وميمكنش تبقى الفوضى ودبا لي خارج على القانون يتحمل المسؤولية ديالو القانونية”.
من جهته، قال يونس المجاهد، رئيس المجلس الوطني للصحافة، في اتصال أجرته معه “كود”، ان هاد الشي ماشي داخل فاختصاص المجلس. مجاهد قال ل”كود” “ميمكنش نعلق على شي حاجة ماشي من الاختصاص ديالي”.
المجلس الوطني دار تغربيلة كبيرة لبطاقة الصحافة وهادا كيفسر هاد الشي كولو