عاود على ماضيه فالمغرب وخدمتو دابا.. السلاوي فحوار مع "زمان" : تقدر تكون هذي آخر مرة نوصل للبيت الأبيض.. وانتدابي كان تطوع مني ودابا بغيت نتفرغ لحياتي الشخصية

مجلة زمان، فالعدد ديالها رقم 124، دارت حوار مع منصف السلاوي، المستشار الرئيسي السابق لبرنامج التطعيم الأمريكي الحكومي، وعملية "وارب سبيد"، حكى فيه على الماضي ديالو فالمغرب، وخدمتو الحالية، بالإضافة لتجربتو السابقة كقائد لعملية مراقبة إنتاج وتوزيع اللقاحات فميريكان فوقت قياسي.
منصف السلاوي بان من خلال الحوار أنه ديما مزروب وعندو مايدار، بحيث قال أنا فالطريق لواشنطن، وكانت الستة ونص ديال الصباح فالساعة المحلية دميريكان.
وصرح السلاوي: "تقدر تكون هذي آخر مرة نوصل فيها للبيت الأبيض"، فإشارة للقاءو مع دونالد ترامب فالبيت الأبيض خلال تكليفو بهذ المهمة.
وهضر السلاوي فالحوار على الماضي ديالو المغربي، كولد أكادير دوز شبابو فكازا، وفليسي محمد الخامس، وكيفاش حضر للموت ديال ختو بالسعال الديكي.
وكيقول السلاوي بخصوص انتدابو فهذ المهمة وإعفاؤو من بعد: "دابا، فاللول ديال دجنبر، وكنت علنت أنه فاش غيكونو عندنا جوج فاكسانات معترف بيها، غيرجع عندي الوقت نرجع لحياتي الشخصية، وباش نقبل هذ الدور تطوعا مني، حاجة كتحمس، والاهداف المعلن عنها وصلنا ليهم فالنص ديال دجنبر، ولكن حرصت على البقاء باش تكون انتقالية أفضل مع الفريق الجديد، وبقيت حتى للنص ديال شهر فبراير، وهذشي اللي مدد التفويض ديالي، حيت بقى عندي الحرص على تسهيل الانتقالية".
وزاد السلاوي: "ماتمش انتدابي فالإدارة الجديدة، حيت بقينا على داكشي اللي متفق عليه قبل، لكن كنقدر ليكيب الجديدة وأنا مستعد نعاون اللي كانو محتاجني، غير دابا بغيت نرجع الحياتي العادية والشخصية".
التفاصيل حوار منصف السلاوي فمجلة "زمان" الفرنسية العدد رقم 124.
وهنا رابط الموقع:
https://zamane.ma/moncef-slaoui-jadore-mon-pays-mais-je-ne-pourrais-pas-y-travailler-zamane/?fbclid=IwAR1_uu_ObOX99whU4I3dmmq1UdTwj7Y6-_ul6s8pewxXRXNfuxgWx1-iaRw