التداول على رئاسة العصبة الجهوية العيون الساقية الحمراء لكرة القدم كيدخل الشك.. انتخاب رئيس جديد-قديم بعد مشاورات وتدخلات ف الكواليس

Elouali.zaz.1987@gmail.com
عصبة الصحرا لكرة القدم علنات البارح فالجمع العام الإنتخابي عن رئيسها الجديد القديم اللي هو الحسين بن عويس، واللي غادي يقود العصبة لولاية جديدة فيها 4 سنوات من بعد ولاية أولى كان ربحها، وجا بعد ذلك بديديه لشگر وربحو فالإنتخابات، قبل ما يرجع ويديها فهاد العام.
كواليس هاد الجمع العام الإنتخابي للعصبة الجهوية العيون الساقية الحمراء دارت فيها بزاف ديال الهضرة خاصة وأن حزب الإستقلال ضغط باش يدار الرئيس اللي بغا هو، بحيث عقد اجتماعات مع عدد من النافذين فهاد العصبة اللي من بينهم الرئيس القديم/الجديد باش يكون الحسين بنعويس هو الرئيس وبلا ما يترشحش الرئيس السابق ديال العصبة بديديه لشگر اللي كان سبق ليه كان أمين المال ديال العصبة فالولاية الأولى ديال الحسين بنعويس.
مصادر "گود" أكدات أن قيادي كبير ف حزب الإستقلال وفي سياق محاولاته الرامية لبسط نفوذه على گاع القطاعات جمع هاد المتحكمين فالعصبة و أوصى على الحسين بنعويس باش يكون رئيس لهاد الهيئة الرياضية، وبالفعل هادشي اللي طرا واخا كان مترشح آخر للرئاسة ولكن الضوصي ديال ترشيحو كان ناقص وما تعتامدش.
مصادر أخرى قالت ل "گود"، أن هاد التدخل ف كرة القدم راجع لكون حزب الاستقلال باغي الرياضة ف جهة العيون الساقية الحمراء تحمر لوجه، وهادشي بحكم أن الجهة فيها بنية تحتية ف المستوى وملاعب وغيرو، وبغاو الرياضيين ولاد المنطقة يبرزو ويكونو فمستوى الرياضة الوطنية و كذلك لفراقي تلعب دور مهم فالبطولات الوطنية وعلاش لا يخرجو من المنطقة نجوم يمثلو المنتخبات الوطنية.
المصادر أيضا أفادت أن هاد الأسماء التي يتكرر وجودها فتدبير العصبة كيحيل على بزاف خصوصا أن هضرة كدور حول أن بديديه لشگر غادي ياخد مسؤولية أمين المال ديال العصبة عاوتاني، وهادشي كيقول المصدر ماشي معقول وغير منطقي، موجها سؤالا واضحا علاش بالضبط هاد جوج ديال الأسماء هوما اللي كيكونو فالعصبة؟ و علاش ما تكونش أسماء اخرى؟