تلاقى بأشرف وتكلف بمصاريف السكن ديالو وتعليمو.. عويطة ل"كود": كان مازال كيدور فالقصر الصغير باش يعاود يحركَ لكن قدرنا نعتقوه

تلاقى جلال عويطة، المشرف العام لمؤسسة "عطاء" الخيرية، وصاحب تطبيق "يتيمي"، بالطفل أشرف، اللي حطم قلوب المغاربة ففيديو بان فيه كيصارع الموت على سواحل مدينة سبتة، بعدما مشا ليها هو وآلاف الحراكَة القاصرين المغاربة.
وحط عويطة تدوينة على موقع التواصل الاجتماعي "فيسبوك"، هضر فيها على مجموعة من النقاط اللي اتفق مع أشرف عليها، منها تغيير منزلهم العشوائي الضيق ابتداء من السيمانة الجالة، وعودة أشرف للتكوين والالتحاق بنادي رياضي.
https://m.facebook.com/story.php?story_fbid=3946801158702890&id=100001191336638
وكشف عويطة فتصريح ل"كود"، ابرز تفاصيل لقاؤو بالطفل أشرف، وقال أنه من بعد ما شاف الفيديو لي ألمو بزاف، بحالو بحال جميع المغاربة، فاليوم الموالي اجتمع مع اعضاء المؤسسة، باش يقلبو على حل لهذ الدري، خصوصا وأنه كيعيش الفقر واليتم.
عويطة من بعد ما ستنفذ جميع السبل للوصول لأشرف، قرر اخيرا يدير بوسط ف"فيسبوك"، طلب فيه من المتابعين، اللي كيعرف شي حاجة عليه، يعلمو، "وهكذا تلقيت مكالمات كثيرة، دبال ناس قولولي شافوه هنا او لهيه.. حتى هضر معايا الصحافي تمكن من انه يتلاقى بيه، وجابو عندنا للرباط، مع الأم اللي متبنياه"، حسب ما قال.
واتفق عويطة هو الام ديال أشرف على خطة لإنقاذو من الضياع، وهكذا قرر عويطة، مع أفراد المؤسسة، باش يبدلو لأشرف السكن الصفيحي اللي عايش فيه، ويتكلفو بمصاريف الكراء ديالو لمدة عام، ويدخل يتعلم فشي معهد الحلاقة أو الأليمينيوم، إلى جانب تعلم لغة جديدة، بالإضافة للالتحاق بنادي رياضي.
وقال الفاعل الجمعوي ان أشرف، فاش رجعو الحرس الحدودي، كان باقي فالقصر الصغير، حيت كان كيفكر يحركَ مرة أخرى، لكن قدر يتعتق، "وواعدنا أشرف أنه غيبقى فالمغرب وماعيعاودش يفكر يحركَ إلى الوضعية ديالو ولات مزيانة"، حسب عويطة.
وكشف عويطة ل"كود" ان اشرف دابا فكازا، فمسكن جديد، وماشي مع الأم ديالو، باش يقدر يبدل شوية الجو ويرتاح نفسيا، على ما تصلح الأمور.