هذا ماتعلمش يحترم الاختلاف فالرأي والموقف.. بلكبير عاير الصحافية نورا الفواري وحرض ضدها الناس غير حيت مطبعة مع إسرائيل.. ودار تصويرة ماشي ديالها ودار فراسو الضحك – تدوينة

عبد الصمد بلكبير، اليساري اللي تعرف بتطبيلو للخوانجية، واقيلا ماتعلمش يحترم المواقف ديال الناس وآراءهم، بحيث حط تدوينة منقولة، عاير وسب فيها الصحافية عن جريدة الصباح، نورا الفواري، واخا ماجبدهاش بالإسم، وقال عليها "صهيونية".
وقال بلكبير فتدوينتو المنقولة: "هاذي هي صحافية جريدة الصباح اللي كتبات على صلاة التراويح، وقالت أنها مزعحة وتشكل فوضى... كلشي يبارطاجي باش يتفضحو الصهاينة اللي عايشين بيننا... أي واحد يشري جريدة الصباح غادي يعرف شكون غادي يستافد منها وشكون خدام فيها".
والتدوينة اللي بارطاجا بلكبير فيها تصويرة ديال شي وحدة خرى أصلا وماشي هي، مصورة مع الناطق الرسمي باسم الجيش الإسرائيلي بالعربية، أفيخاي أدرعي، لكن الكلام المنشور كيمعني على الفواري، حيت هي اللي خدامة ف"الصباح"، وكانت تعرفات بموضوعها حول صلاة التراويح، ومعروفة كذلك بإشادتها للتطبيع مع إسرائيل.
وهكذا بلكبير بكلامو هذا ماعايرش غير الفواري فقط، بل حرض الناس ضدها وضد جريدة الصباح كلها بعدما طالب بمقاطعتها، واخا هذشي كان ممكن يساهم فتشريد صحافيين وعائلات لا ناقة عندهم ولا جمل فهذشي، وعاد زايدها بصورة خاطئة ديال بنت ماعندهاش دخل بهذ الصراعات الضيقة، اللي كيفتاعلوها الخوانجية ضد كل واحد ختلف معاهم فالرأي.
https://m.facebook.com/story.php?story_fbid=3989685764480681&id=100003178900106