هذي هي سكيزوفرينيا الكائن المغربي الميزوجين.. مومو نقص من المرا واحتقرها ومشا يحط تصويرتو مع مو ويشكر فيها.. أودي كون كنتي تبغي مك كَاع ماتخلي شي حد يعتبرها "ولية" و"ضعيفة" وتنوض تصفق ليه

هذي سكيزوفرينية فشكل عند الكائن المغربي الذكوري، فمن جهة المنشط الإذاعي محمد بوصفيحة، الملقب بمومو، ناشر فالصفحة ديالو فالفايس تصويرة مع مو بمناسبة عيد الأم، كَالس يشكر ويتغزل فيها، لكن فالمقابل، مومو ماعندوش مشكل واحد يجي ويعاير العيالات، اللي منهم مو نيت، بدعوى أن داك المعيور كنسمعوه يوميا، وكيقولوه حتى العيالات براسهم.
https://m.facebook.com/story.php?story_fbid=316759306561602&id=100046826057732
هذ الكلام كيبان لي حشومة وعار يصدر عن منشط، لكن هذشي بصح قالو مومو فإطار ردو على الهاكا اللي وجهات لإذاعة "هيت راديو" استفسار، بعدما استضف فبرنامجو "لو مورنينكَ دو مومو" الممثل طارق البخاري، اللي ماخلاش للعيالات بالهضرة التمييزية والعنصرية، بينما مومو كيتفرج وماوقفوش وخلا هذ الكلام يدوز بشكل عادي.
واللي كيقتل بالضحك والفقصة فنفس الوقت فرد السي مومو هو أنه قال بأن الهضرة اللي قال البخاري، واستعمالو لعبارات "غير ولية" و"المرا حساسة ماشي بحال الراجل"، وكلام آخر كثير، هي هضرة شائعة وعادية، وماكتعتبرش فالمجتمع المغربي "صور نمطية"... بلا شك المنشط "القافز" واقيلا مافاهمش آش كتعني الصورة النمطية أصلا، وماعارفش أن "الستيريو تايب" هو كلام شائع كتبناه مجتمعات كتتسم بالأمية والتخلف، كلو محمول بصور مغلوطة، فيها عنف وتمييز وعنصرية واحتقار تجاه فئات، وحشومة، حشومة منشط واحد بحالك أسي مومو يخرج يكرسها ويعززها.
ممكن مومو ميزوجين، أو واقيلا غير داوي خاوي، بلا ما يستوعب حجم العنف الرمزي والتنقيص من كرامة وقيمة الإنسان اللي كيتضمنو بحال هذ الخطاب، اللي بان أنه كيدافع عليه غير باش يتهرب من عقاب الهاكا ويلقى شي تخريجة مسلكاه.
عند مومو الزهر اللي "الهاكا"، اللي كتدير عمل جبار تشكر عليه، ماعاقباتوش على كلام صدر منو هو نيت خلال البرنامج المعلوم، فردو على هرطقات طارق البخاري، بحيث قال هضرة فيها نمطية وسوء تقدير للجنس الأنثوي، فاش قال أن "المرا راجل كثر من شي ذكورة"، بحال إلى كان معيار الأخلاق هو الراجل، وفهذا تمييز كبير بزاف كان خاص تعاقبو عليه هيئة الاتصال السمعي البصري، كيف كان خاص تربيه على الرد ديالو عليها اللي فيه تأييد للتمييز ضد العيالات.
وفمقابل هذشي كامل، الميزوجين مومو حاط اليوم صورتو مع مو وكَالس يدير فيها مرضي... أودي كون كنتي تبغي مك بالصح وتسمحش لشي حد يقول عليها ولية، وضعيفة، والراجل حسن منها، وكون كنتي تبغي مك بصح ماتصفقش لكلام كيحتقر النساء، وتشوف أن هذ الكلام عادي حيت شائع وكيقولو كلشي... هذشي حشومة وعار يقولو منشط، وكيبين أن المغرب بعناصر بحالك مازال خاصو أميال باش يحقق المساواة بين الجنسين.