دابا عرفنا علاش حامياه مدريد. غالي كان جاسوس للصبليون وها الوثائق ديالو وها جنسيتو الاسبانية

زلزال خرجاتو "لاراثون" الاسبانية قبل ساعات من مثول ابراهيم غالي زعيم البوليساريو امام القاضي غدا واحد يونيو من صبيطار "لوگرونيو" ب"لاريوخا".
اليومية الاسبانية قالت باللي هاد السيد كان جاسوس. مخدمو بوليس النظام الديكتاتوري فرانكو. عاونهم وخلصوه على تقاريرو من 1971 حتى 1975 السنة اللي استرجع فيها المغرب الصحرا عبر المسيرة الخضرا
اليومية خرجات رقمو باش كان خدام فالبوليس وبطاقة تعريفو الوطنية الاسبانية اللي كيتبين باللي عندو الجنسية الاسبانية ووثائق اخرى تعيد نشرها "كود". ورقم هاد البطاقة هو B7248055
المصدر قال ان غالي لي تولد ف1949 غادي ينظم للبوليس الاسباني فالستينات، ولكن المخابرات الاسبانية، غاتكتاشف انه فالبوليساريو لي ختاطفات عناصر اسبانية، وهادشي غايخليهم يطردوه ويحطوه تحت المراقبة.
وفتقارير الصبليون عليه، هضرو كيفاش كان كيمشي يجمع التمويلات والسلاح باش يحارب الاسبان، وكان كيتقدم ليه هادشي من عدة دول عربية بين السعودية والجزائر وطبعا المغرب، ولكن فالتقارير غايجي انه قالي بأن جبهة التحرير غاتطرد الصبليون، وغاتحارب المغرب أيضا باش ماتخليهش يسترجع الصحرا، وزاد ان السلاح باش يحاربو موجود بزاف.
هاد ابراهيم غالي اللي من قبيلة اركيبات فرع اولاد الطالب فخضة اولاد بن لحسن ديال المخابرات الاسبانية. هما قالو قطعو معاه مع المسيرة الخضرا ولكن ما كاينش دليل علي هاد الشي.