واش بسبب الزيار اللي دار الوالي اليعقوبي؟..العراقيل والبيروقراطية خلات مستثمرين وملايرية حطو فلوسهم فمشاريع بالعاصمة واخا الجايحة يخافو من الافلاس ويوقفو كولشي ويمشيو فحالهم

مستثمرون كاعين على التزيار اللي داير الوالي محمد اليعقوبي فالعاصمة، كاعين حيث مكاينش ظروف كتشجع على الاستثمار، وفق ما أكده مستثمرون ل"كود".
فالوقت اللي السياحة كتموت والاستثمارات كينقصو والجائحة عقدات الوضعية الاقتصادية، كاينين ملايرية اختارو يصمدو ويخدمو ويبقاو الاستثمارات ديالهم واخا الجائحة.
ولكن هاد المستثمرين كيتشكاو من العراقيل، عراقيل ادارية وأحيانا التزيار فالمراقبة وتشديدها على أبسط الأشياء.
على عكس الفترة السابقة اللي كان فيها الوالي محمد امهيدية، بحيث كان التبسيط وتشجيع الاستثمار، فإن الوالي الحالي اللي تروج فحقو أنه غايتنقل لكازا يكون والي تما، وهو تم نفيه من مصدر جد موثوق، الا ان هاد المستثمرين مكرهوش يتبدل، مقدروش يخدمو معه.
مستثمر كيأمن بالقيم الليبرالية قال ل"كود" :"راه ميمكنش بالتزيار غانمشيو مزيان، خص التخفيف والمزيد من التسهيلات"، مضيفا :"العاصمة تستحق مسؤولين قادين على تدبير المرحلة الصعبة اللي كيمر فيها الاقتصاد الوطني، راه حنا كنديرو للي علينا كنخلصو الضرائب ونخدمو ناس ونقادو وراقهم ديال الضمان الاجتماعي والصالير مزيان، ولكن مبغيناش العراقيل عيينا".
مصادر "كود" قالت بلي كاينا بيروقراطية في تدبير عدد من الملفات المتعلقىة بالاستثمارات، سواء فالعقار أو السياحة، هادشي ضر بزاف بالنشاط الاقتصادي فالعاصمة.
فالولاية ديال محمد الصديقي، عمدة الرباط، كولشي عارف التخلويض اللي كان فقطاع التعمير (الرخص ووو)، وكان تقرير المفتشية وتحقيق داخلي للجماعة، هادشي سالا باقالة المسؤولة عن قسم التعمير لكن بدون محاسبة.
دبا الى الملايري كيتشكا من العراقيل الادارية، اش غادي نقولو على المقاول الصغير والمتوسط، واش غادي نقولو على المواطن والموظف اللي باغي يقادر امورو الادارية.
تبسيط المساطر الإدارية اللي جابت الحكومة فيه أمل كبير، ولكن ما حد "الولاة بيدهم الاستثمار وبعضهم صعيب تعامل معهم، راه يستحيل نهضرو على تشجيع الاستثمار وتطوير الاقتصاد".
وقال صاحب مشروع استثماري ل"كود" :"البلاد خصها نفس استثماري جديد، خاص الحرية الاقتصادية تكبر".
قبل أيام صرح الطاهر أنسي، الكاتب العام السابق للنقابة الوطنية للمطاعم والمقاهي والنوادي بمراكش، ل"كود" بإن الوضعية اللي كادوز منها المطاعم السياحية والفنادق والملاهي صعيبة بزاف.
وأوضح أنسي ل"كود" :"ناس كتبيع الماترييل ديالها حيث خايفا من الحجز وهادشي غادي يكثر مزال، غير باقيا حالة الطوارئ الصحية".
وأضاف أنسي ل"كود" :"دبا بداو باغين يشدو صحاب الشيكات، وحنا صيفطنا للدولة باش يلقاو صيغة بين الكاري والمكتري، وانا من ناس لي دعاوني حيث 8 اشهر مخلصتش الكرا ، رغم انني 30 عام خدام وكنخلص الضرائب ونجيبو العملة الصعبة ونخلقو جو ملائم للسائح الأجنبي".