عبارات عنصرية وإسلاموفوب فمركز كيفورمي الأئمة ففرانسا: العرب برا.. والمسلمين حلالف..

مجهولين كتبو عبارات إسلاموفوب فالحيوط ديال معهد "دار النور" فمارتيكَ، التابع لمؤسسة الغزالي ديال الجامع الكبير فباريس، اللي فيه كيتم تدريب الأئمة.
من العبارات اللي توجدات على جدران "دار النور"، لبارح الأحد، كتابات عنصرية ضد المسلمين، وسب وشتم من قبيل "المسلم = حلوف"، و"ا العرب خرجو برا"، وعاد عبارات كتحيل على حدث مقتل المدرس "ساموييل باتي" بسبب عرضو لرسوم كاريكاتورية على الرسول محمد ديال "شارلي إيبدو"، وأسماء خرين لضحايا الإرهاب ففرنسا.
ومدير مركز التدريب، عز الدين جغبالو، هو اللي لقى هاد الكتابات، مع 8:30 ديال الصباح فاش كان غادي ليه، وقال: "مابغيتش نقرا شنو مكتوب".
واضاف جغبالو أن الطلاب فاش وصلو للمركز وشافو داكشي، تصدمو وتخلعو.
الشرطة العلمية توصلات بأولى النتائج فمرحلة البحث على الفاعلين، وفتحات تحقيق، بناء على شكوى مدير مركز التدريب.
وجا عمدة المدينة ، كَابي شارو، لعين المكان باش يتضامن مع الطلاب، وقال "حنا كندينو هاد الأعمال اللي ماعندها معنى، وبغيت نذكر أن فمدينتنا وجمهوريتنا ماكاينش بلاصة لهاد السبان والتهديدات".
التفاصيل هنا:
https://france3-regions.francetvinfo.fr/provence-alpes-cote-d-azur/bouches-du-rhone/martigues/martigues-des-inscriptions-racistes-et-islamophobes-sur-les-murs-d-un-centre-de-formation-des-imams-2166718.html